Eusko Jaurlaritzari Lemoizko eremu horretan zer egin behar denaren erabakia herritarron eskuetan uzteko exijitzen dio LABek. Iberdrolak eragin dituen kalteak konpon ditzala, eta eremu horretako proiektu horren kudeaketa eta kontrola publikoa izan daitezela, eta kalitatezko enplegu publikoa sortuz. Agerraldi bat egin dugu gaur honetaz guztiz hitz egiteko.

Pasa den astean, Arantza Tapia Eusko Jaurlaritzako Garapen Ekonomikorako Sailburuak, AZTI arrantza laborategiko zuzendari orokorra den Rogelio Pozorekin batera, bi arrain haztegi proiektu iragarri zituzten. Bata, Mendexan kokatua, datorren urterako martxan egongo da, eta bigarrena, Lemoizko zentral nuklearra dagoen eremuan epe luzeago batean.

Herriak determinazioz erantzun zuen ingurumena eta osasunaren alde, eta energia nuklearrak Euskal Herrian tokirik ez zuela argi geratu da urteetan zehar. Berrogehi urte hauetan zehar, herritarrok behartuta egon gara Iberdrolari zentralaren eraikitze gastuak ordaintzera, eta urte guzti hauetako aldarrikapena izan da Basordako eremu horretan, porlan puska erraldoi hori kendu eta edo euskal kostaldeak eremua berreskuratu zezala, gune natural bat sortuz, edo herritarron onurarako instalazioaren bat jartzea bertan. Instalazioa jartzea erabakiko balitz, kudeaketa eta kontrol publikokoa izan beharko lituzke, kalitatezko enplegua sortuz eta herritarrok modu demokratiko batez erabaki behar dugularik.

Arrainen haztegia aukera bat izan daiteke, eta LABek ez du horren aurka egingo, baina marra gorriak jarri nahi ditugu. Euskal herritarron onurarako izan behar du, erabakia herritarrek izango dute, zerbitzu publikoa izango da, kalitatezko enplegu publikoak sortuko ditu eta herritarron osasunarekiko eta naturarekiko errespetagarria izango da.

Basordako lur eremua Eusko Jaurlaritzaren esku geratuko da, eta horrela izan behar du, baina euskal kostaldeari egindako kaltea erreparatzearen kostua ordaintzea exijitzen diogu Iberdrolari.

Dakigunez, itsasotik ura hartzeko dauden tomak baliagarriak dira. Proiektua martxan jartzeko lur eremua egokitzeak 18 milioitatik gora kostatuko litzateke, eta faktoria 25 miliotik gora. Kapital pribatuak interes handia omen dauka ganbak, langostinoak, rodaballoa, salmoia, arrankariak.. hazteko.

Bestalde, Eusko Jaurlaritzak arrantza sektorea bultzatu nahi badu, fokoa ez dezala oraingoz arrain haztegietan jarri. Ez dezatela arrantza hiltzen utzi, egin dezatela behar bezalako arrantza politika eta egin beharrezko inbertsioak sektorean. Eta haztegi bat jartzekotan, haztegi horren kudeaketa Euskal Herriko kofradiek egin behar dute, eta bertan hazten diren arrainak, Kantauri itsasoan galdu diren arrain espezieak berreskuratzeko izan daitezela.