EAEko Funtzio Publikoaren Mahai Orokorraren bilera deituta zegoen gaurko, eta LABek beste mobilizazio bat egin du Lakuan. Enplegu publikoa, erosahalmena eta eremu bakoitzean bertan negoziatzeko eskubidea izan dira aldarrikapenak, ikasturte honetan ere borrokatzen ari garen ildoak. Beste behin Eusko Jaurlaritzak negoziaziorako borondate eza argi utzi du edukietan eta formetan.
Edukiei begira, Madrilek agindutako soldata murrizketak zintzo betetzen jarraituko du hemen negoziatzeko duen borondate falta ezkutatuz. Langileok 2021 urtera arte galdu dugun %15eko diru galeraz ez du hitz egin nahi, eta hurrengo urteetarako erosahalmen galera ekarriko duten Madrileko igoera ez nahikoak inposatuko dituzte. Diru-bilketa handia egin dutelako ahoa bete, baina langile publikoon soldata ere bestelako gastuetarako erabiltzen jarraitu nahi dute. Txanda kontratua langile publiko guztiei zabaltzeko aukera ere baztertu egiten du. Enplegu planik ere ez dutela negoziatu nahi argi dago, eta Europako eta Madrilgo aginduak betetzera mugatuko dira, euskal administrazioetan dauden lanpostu gabeziak, prekaritate egoerak eta iruzurrak mantenduz.
Formari begira, bilera bi eguneko aurreabisuarekin egin izana salatu nahi dugu. Berria ez den jokabide honek oinarrizko eskubidea den Negoziazio Kolektiboaren Mahaia aurrekontu autonomikoei begirako tramite huts bihurtu du.
Hauek dira beste behin Eusko Jaurlaritzaren ikasturte honetarako ildoak. Eroso dago errezeta neoliberal zaharkituak ezartzen, negoziazio kolektiboaren ukazioaren ardura gainetik kenduz, baina berak ere ematen ez dituen gezurrezko aurrerapausoekin propaganda egiten.
Pasa den ostiralean eta gaur egindako elkarretaratzeei jarraituz, LABek negoziazio kolektiboa eta mobilizazioak bultzatzen jarraituko du, Eusko Jaurlaritzak eta beste euskal erakundeek dituzten eskumenei uko eginez duten madrilekiko duten menpekotasun jarrera lotsagarria aldarazteko. Gaurko bilera ere antzerki hutsa izan da, aurkeztutako neurri guztiak dekretuz onartuko dituztela lotsarik gabe onartzen jarraitzen dutelako, eta langile publikoen eros ahalmena urratzen jarraitzen dute. Euskal Herriko administrazio eta enpresa publiko guztietan ÂŤEnplegu publiko duina, erosahalmena bermatu, berton erabakiÂť aldarrikatuko dugu.