Joan den astean, Argitxu Dufau Ipar Euskal Herriko LABeko bozeramaileak eta Eñaut Aramendi sindikatuko Ekintza Sozialeko kideak frantses poliziaren deialdi bat jaso zuten, beste eragile batzuetako 5 pertsonekin batera, urriaren 2an Hendaiako komisaldegian deklaratzera joateko.
Leporatzen diete poliziaren hitzetan “irregularrak” diren pertsonei laguntza ematea. Honen aurrean, Dufauk adierazi du “jarraitzen dugu erraiten eta ozenik errepikatzen elkartasuna ez dela delitua eta inor ez dela ilegala”, bideo honetan ikus dezakegun moduan.
LABek, beste hainbat eragilerekin batera, elkarretaratzea deitu du Hendaiako komisaldegiaren aurrean, urriaren 2an, 8:45ean. Aramendik, “jendarte guztia eta bereziki langile guztiak” deitu ditu mobilizazio honetan parte hartzera, deklaratu behar duten kideei “sustengua erakusteko eta Europatik datozen migrazio politiken kontra mobilizatzeko”.