Borroka bete-betean, LABek deitutako greben atarian eta sindikatu guztiei eskua luzatua zuen momentuan akordioa iragarri dute, borroka baztertuz eta hitzarmen hobe bati uko eginez.
Gipuzkoako metalgintzako hitzarmena berritzeko negoziazioen baitan patronalak mahai gainean jarritako lehenengo proposamena onartu dute ELAk eta UGTk. Hala, borroka erabat baztertu eta hitzarmen hobe bat izateari uko egin diote, are gehiago aintzat hartuta sektoreko datuak onak direla eta horretarako aukerak bazeudela.
Izan ere, elkarrekin mobilizatuz gero sektorea mobilizatzeko dugun gaitasuna agerikoa da, baina LABek intersindikala deitzeko eginiko aurrera pausua zapuztu du trukean patronalari bake soziala eskaini dion akordio honek.
Araba eta Bizkaiko metalean izandako borrokek ezarri dute aurrekaria Gipuzkoako metalean. Guztietan erabakigarria izan da LAB, grebak deitu, antolatu eta egin ditugu eta hiltzat ematen ziren hitzarmenak berreskuratzea lortu dugu. Hain zuzen ere, horixe da ADEGIk nahi ez duena, eta ELA bidelagun izan du bere asmoak aurrera eramateko, berriki elikagaien industriako merkataritzan gertatu bezala, grebarako 24 ordu falta zirenean sinatu baitzuten akordioa.
LABek agerraldia egingo du bihar, maiatzak 12, Gipuzkoako Metalgintzako akordio honen nondik-norakoen irakurketa plazaratzeko.