2024-03-05
HomeZerbitzu PublikoakEusko JaurlaritzaEAEko Administrazio Publikoaren Legearen aurreproiektua, itxurakeria eta iruzurra berriro ere

EAEko Administrazio Publikoaren Legearen aurreproiektua, itxurakeria eta iruzurra berriro ere

Atzoko Gobernu Kontseiluan Administrazio publikoei gardentasuna eta herritarren parte-hartzea areagotzeko ustezko asmoarekin hainbat neurri aurkeztu zituen Eusko Jaurlaritzak. LABen iritziz neurriok itxura positiboa eduki badezakete ere, eskasak izateaz gain aurpegi garbiketarako baino ez dute balioko.

Lehen irakurketa batean, eta kontutan hartuta eskuinaren joera izenburu potoloen atzetik letra xehe arriskugarriak ezkutatzen direla, LAB ezin da poztu aurkeztutako ustezko neurriokin. Hain zuzen ere, Administrazio Publikoa argaltzen duen politikak egiten ditu gobernuak, benetako gardentasuna urratu egiten du. Horrela, ustezko gardentasun hori oinarrizko egituran bakarrik emango zen, neurri gabeko eta ezelako herri-kontrolik gabeko ilunkeria, negozioa eta adiskidekeria pribatizazioaren bidez handituz. Izenburuetan iragarritakoa, funtzionario eta kargudunen ordainsariak publiko egitea alegia, indarrean dauden legeak betetzea besterik ez da, beraz sinisten ez diegun borondatean oinarritzen da. Euskal sektore publikoko erakundeen erregistro bat eratzea, eman nahi dituzten pribatizazioen aurrean jendartearen kezka arintzeko ariketa bat besterik ez da, arazoaren muina desbideratuz.

Bigarren ardatzak ere kale egingo du, «erregelamenduetarako herri-ekimenaren bidez» jendartearen ustezko parte-hartzea ez baita batere sinesgarria. Ezaguna da Jaurlaritzak eta bera eusten eta sustatzen duen EAJk zein jaramon egiten dien jendartearen aldarrikapenei, hutsaren hurrena alegia: horra hor zerbitzu publikoetan lanaldia handitzen duen dekretazoaren aurrean langileek behin eta berriz adierazitako borondateari, edota lan erreformak berton ez aplikatzeko luzatutako aldarrikapenei Jaurlaritzak egindako muzina. Herriak eduki badu ahotsa eta askotan adierazten du kalean, baina halako neurriak ongi etorriak badira ere, agintariek herriaren borondatea soilik bide burokratikoen bidez bideratzea sakondu nahi dute.

Azkenik esan herritar eta langileok parte hartzeaz gain erabakietan ere egon nahi dugula, eta alde horretatik iniziatiba hau guztiz ez-nahikoa da.

Beraz, borondatea benetakoa bada eta zerbitzu publikoetan gardentasuna eta herritarren parte-hartzea bultzatzea bada helburua, LABen ustez egitasmo hau oso mugatuta dago: Pribatizazioak ekiditeko eta herritarron erabakitzeko ahalmena bermatzeko mekanismoak zeintzuk izango dira; erabakigunea Madrilen dagoela jakinda, handik etortzen diren euskal herritarren borondatearen kontrako lege eta aginduei aurre egiteko tresnak eta jokabideak…
 

 

 

AZKEN ALBISTEAK | ĂšLTIMAS NOTICIAS

LABek Munduko Federazio Sindikalak Sao Paulon egindako Kontseilu Presidentzialean parte hartu du

Pasa den asteburuan Munduko Federazio Sindikalaren Kontseilu Presidentziala egin zen San Paolon, Brasilen. Munduko Federazio Sindikala 1945 urtean sortutako elkartea da. 133 herrialdetako 105 milioi langile inguru ordezkatzen ditu. Kontseilu Presidentziala bere zuzendaritza gune nagusia da, kontinente desberdinetako 50 kidek osatutakoa.

Lan eta bizi baldintzak ez dira hobetzen eta prekaritateak egiturazkoa izaten jarraitzen du

Araba, Nafarroa, Gipuzkoa eta Bizkaian 141.582 langabe daude; beraz, pasa den urtetik %2,13a jaitsi da langabezia Hego Euskal Herrian. Enplegua, ordea, sektore prekarioetan sortzen ari da, lan baldintza prekarioekin eta egoera zaurgarrian dauden herritarren bizitzetan inpaktu zuzenagoa eraginez. Hego Euskal Herrian, 25 eta 64 urte arteko bi herritarretik bat prekaritate egoeran bizi da, enplegua izan arren, bizitza duina bermatzeko diru-sarrera nahikorik gabe.

San Juan de Dios ospitaleko langileek elkarretaratzea egin dute Iruñean, hitzarmenaren negoziazioa blokeatuta dagoela salatzeko

San Juan De Dios Ospitaleko enpresa batzordeak elkarretaratzea egin du Iruñean, Osasunbidearen egoitzaren parean, Oliveto kondearen kalean. 2023-2024 hitzarmen kolektiboaren negoziazioaren egoeraren berri eman dute. 2023ko abenduan, Grupo Independiente eta LABek osatutako enpresa-batzordeak, negoziazio-plataforma aurkeztu zuen, eta abenduaren 15ean mahaia eratu zen, urtarriletik aurrera negoziazioari ekiteko.