LABek joan den otsailaren 2an onartutako Donostiako etxebizitzak eta bizitegi eraikinak zaharberritzeko diru laguntzak emateko oinarri arautzaileak onartzen dituen ordenantzari alegazioak jarri dizkio.
Ordenantza berri honen arabera, Donostiako Udaletik eraikinak eta etxebizitzak zaharberritu nahi dituzten jabekideen erkidegoek diru laguntzak jaso ahalko dituzte, nahiz eta obra horietako langileei eraikuntzako hitzarmena ez aplikatu.
Arau berri honek aurreko udal araua bertan behera uzten du. Aurrekoak espreski aitortzen zuen diru laguntzak jaso ahal izateko derrigorrezkoa zela obra horietako langileei eraikuntzako hitzarmena aplikatu behar zitzaiela.
LABentzat PNV, PSOE eta PPren botoekin ateratako Donostiako Udalaren erabaki hau atzerapuso handi bat da, eta enpresarientzat lan araudia ez betetzeko deia argia da.
Instituzioek ezin dute prekarietatea bultzatu. Alderdi politiko hauek atzera egingo dutela zinez espero dugu, eta LABen alegazioak onartuko dituztela. Garaiz daude euren akatsa konpontzeko.
