2024-07-14
HomeEkintza SozialaPolitika sozialaDiru Sarrerak Bermatzeko Errenta: Kriminalizaziorik ez!, errenta hobetu eta zabaldu!

Diru Sarrerak Bermatzeko Errenta: Kriminalizaziorik ez!, errenta hobetu eta zabaldu!

LAB sindikatuak bere kezka aditzera eman nahi du azken egunotan Diru Sarrerak Bermatzeko Errentaren inguruan hainbat alderdik eta komunikabidek azaldu duten jarrera erasokorra eta fede txarrekoa direla medio. Bada asmo politiko zehatza prestazio hau iruzurrarekin lotzeko, eta aldi berean, eskubide sozial honen izaera desitxuratzeko. Aurreiritzi klasista hauek giroa prestatu nahi dute ondotik murrizketa berriak ekartzeko.

Egunotan ezagutu dugu hainbat berri interesatu, eta testuingurutik erabat aterata. Helburu argi batekin: susmo txarra zabaltzea prestazio hau jasotzen dutenen gainean. Pasa den astean, Gasteizko Parlamentuak, PPren ekimenez eta PNV eta PSOEren laguntzaz, onartu zuen Eusko Jaurlaritzari eskatzea komunitatearen aldeko lanak zerrendatzea, gero diru-sarrerak bermatzeko errenta jasotzen dutenak egin ditzaten. Geroxeago, komunikabideetan ikusi dugu Lanbide prestazio hau jaso edo eskatu duten milaka lagunen bila ari omen dela, jakin gabe non bizi diren.

Diru-sarrerarik gabeko pertsonen egoera ez da gutxi batzuen kontua, ezta ardura indibidualari dagokion kontu huts bat ere. Desberdintasun sozialak eta pobrezia erabat loturik daude erabaki politiko eta ekonomiko jakin batzuekin. Horregatik ez da onargarria lan eta pentsioen erreformak onartu, etxebizitzarako eskubidea ukatu eta banketxeei dirua parrastan ematen dieten horien aldetik, zalantza eta susmoa barreiatzea inongo babes ekonomikorik ez dutenen aurka. Erabat onartezina da idaztea lokalizatu gabeko milaka pertsonei buruz, aztertu gabe horren atzean egon daitekeena (administrazioaren akatsak, datu okerrak, eskaerak eta onartutako prestazioak nahastea,…), are gehiago, prestazio hauek kudeatzeko sistema berria bitarteko tekniko eta materialik gabe jarri zenean martxan.

Hori ez da bidea. Konponbidea ez da kriminalizazioa hauspotzea murrizketa berriak arrazoitzeko. Auzi honen muina da nola egin eraginkor oinarrizko diru sarrerak izateko eskubide soziala. Horregatik, Eusko Jaurlaritzari eskatzen diogu bide honetatik ez jarraitzeko eta hel diezaizkion egiazko lehentasunei. Beraz, LABek Eusko Jarlaritzari exigitzen dio:

– Madriletik inposatzen zaizkigun murrizketak (langabezia, kopagoa, osasun unibertsala,…) ez aplikatzea.

– Diru Sarrerak Bermatzeko Sistema errebisatzea: aurreko legegintzaldiak eragindako murrizketak bertan behera uztea, gutxieneko diru-sarreren topea aldatu jende gehiago atenditzeko, errentaren zenbatekoa igo eta eman baliabide tekniko eta material gehiago kudeaketa publikoko zerbitzu bat eduki eta eskaerei modu azkar eta duinez erantzuteko.

– Kalitatezko enplegu politikaren aldeko neurriak, lan erreformaz haratago. Eta horrekin batera, enplegu publikoa eta inbertsioak herritarren bizi kalitatea hobetzeko.

– Etxebizitzarako eskubidea bermatu (etxegabetzeak bertan behera utzi, hipotekak alokairu soziala bilakatu eta etxebizitzen parke publikoa).  

 

LAB SAREAN
{module[111]}

    

AZKEN ALBISTEAK | ÚLTIMAS NOTICIAS

Niessenen enpresa ituna adostea #LortuDugu

Langileen borrokari esker Oiartzunen kokatuta dagoen ABB Niessen enpresan itun berria sinatzea lortu dugu, enpresa batzordearen babes osoarekin, non LABek 4 ordezkari dituen, ELAk 3 eta UGTk 2. Uztailaren 10ean burutu den langile batzarrean gehiengo osoz onartua izan da ituna, bozkatutako 120 langiletik 119 langileek aldeko bozka eman dute.

Bizkaiko Foru Aldundiko garbitzaileentzako akordio historikoa #Lortudugu

Foru Aldundiko eraikinak garbitzen dituzten langileentzako hitzarmena sinatu dugu Optima azpikontratarekin. Soldata igoera garrantzitsuez gain, bizitza erdigunean jartzeko, sektore feminizatu batean garrantzitsuak diren lan baldintzak lortu ditugu, hala nola, lanaldi partzialak atzean utzi ahal izateko bakante sistema eta zaintzarako lizentzia hobeak.