LABeko Haurreskolak Partzuergoko kideek prentsaurrekoa egin dugu gaur Gasteizen, ordezkapenen zerrenden irekieraren aurreko euren irakurketa plazaratzeko. Hala, Haurreskola Partzuergoak duen funtzionatzeko eredu eskasa kontuan harturik, hurrengo eskaera zehatza egin dugu, Uriarteren dimisioa eskatzeaz gain: Eusko Jaurlaritzak eta Haurreskola Partzuergoak dekretuz ezarritako neurriak mahai negoziatzailera eraman, alde sozialarekin negoziatu eta adostea.

Ekainaren erdialdean Haurreskolak Partzuergoko ordezkapenetarako zerrenden irekierak utzitako irudiekin asaldatu gara denok. Haurreskolak Partzuergoko utzikeriak eta aurrelanketarik ezak ondorio horiek utzi zituen. Afera honek ordea, lan eremu publikoaren esparruan eta hezkuntzan bereziki endemiko den arazo baten aurrean kokatu gaitu berriro ere: ordezkapenetarako zerrenden irekieraren beharra. Errealitate bat da urtero ehundaka haur hezkuntzako goi mailako teknikari eta irakasle ateratzen direla lan egiteko prestakuntza edukita, zergaitik ordea, daude zerrendak itxita?

Haurreskolak Partzuergoan bi aldagaiak batu ziren eta horra ondorioak. Alde batetik, sei urtez zerrenda itxita egotea eta bestetik, ordezkoen beharraren aurreikuspen eza.

LAB sindikatuan harriduraz hartu ditugu hezkuntza sailburua den Uriarte andrearen azalpenak ekainaren 23ko legebiltzarreko osoko bilkuran. ”Holako egoerak aurreikusteko eta kudeatzeko zailak izaten dira. Ezohiko egoera baten aurrean, ezohiko neurria hartu zuten partzuergoko arduradunek”.

Argitu nahi dugu LABetik ikasturte hasieratik zerrendak irekitzea eskatu dugula, baremazio epean zehar eta baremazio epetik kanpo… LABen aurreikusten genuelako holako egoera baten aurrean egon gintezkela. Aitzakiak aitzaki, giza baliabide eta baliabide ekonomikoen faltagatik ez zituztela zabalduko argi esan ziguten.

Era berean, Uriartek esan zuen LAB sindikatuak eskatu zuela "Zerrendak irekitzea eta izen emate hurrenkeren arabera, ordezkapenak eskaintzea".“Gehiengoa duen sindikatuak, LABek, eskatutakoa eta, Haurreskolak Partzuergoko zuzendaritzak hartutako azken erabakiarekin bat egiten duela ”.

Uriarte Andreari esan nahi genioke 2011ko maiatzaren 26an onartu eta dekretuz ezarri zigutela ordezkoen araudia eta horren 3.artikuluan, zerrendak irekitzeko irizpideak zehazten dira. “Langile beharren arabera zerrendak ireki eta ixteko erabakia hartuko da. Langile beharrak dauden bitartean zerrenda irekita utz daiteke etengabe, eta eskabideak sarrera hurrenkeraren arabera onartuko dira.”

Dekretuz ezarrita dago araudi hau, alde sozialak ez du sinatu. Arduraz jokatu eta ez izkutatu zuen utzikeria. Horregatik, hain zuzen ere bat egiten dute eskatutakoak eta hartutako erabakiak, ez kasualitatez.

Baina non dago holako kargu publiko bati suposatzen zaion ardura eta erantzukizuna? Uriarte andreak egun horietan Eibarren egondako pertsonei barkamenak eskatu zizkien eragozpenengatik, baina momentu batean ere ez du ardura politikoz jokatu arazoa konpontzeko neurriak eskainiz.

Denbora luzean negoziatzeko saiakera desberdinak egin dira eta beste gaiekin gertatzen den bezala, ordezkoen araudia negoziatzeko dirua suposatzen duen ororekin topeak aurkitzen ditugu.

Etorkizunean horrelako irudiak ekiditearen beharra agerikoa da. Historikoki LABek oso argi esan du, ordezkapenetarako zerrendak etengabe irekita egon behar zirela.

Berebiziko garrantzia du hezkuntza esparruko eremu guztietan zerrenden irekieraren inguruko prozedura berdina adostea eta baremazioa era egokian arautzea.

Norabide honetan eta helburu hauei behar bezalako soluzioa bidean kokatzen ez diren proposamek edota prozedurek LABen aurkakotasuna topatuko dute aurrez aurre.

Agerikoa da Hezkuntza Sailak gure kolektiboarekiko daukan utzikeria. Ez du 0-3 zikloaren garrantzia onartu nahi.

Behar dugun aitortza aldarrikatzen jarraituko dugu, behar diren inbertsio ekonomikoak, materialak eta politikoak lortu arte.

Beraz, lehen aipatutako guztia eta Haurreskola Partzuergoak duen funtzionatzeko eredu eskasa kontuan harturik, LAB sindikatuak hurrengo eskaera zehatzak egin nahi ditu:

-Eusko Jaurlaritzak eta Haurreskola Partzuergoak dekretuz ezarritako neurriak mahai negoziatzailera eraman, alde sozialarekin negoziatu eta adostea.

-Erakutsitako ardura politiko ezarengatik, Hezkuntza sailburua den Cristina Uriarteren dimisioa aurkeztea.