Bilbon, Iruñean eta Donostian izan dira protestak, eta borrokari eusteko deia egin dute bertan. Izan ere, CETAren aurkako borroka ez da amaituko Espainiako ganberek hura onartutakoan, gero EBko estatu kideek berretsi egin beharko baitute. Hori dela eta, CETAren eta gainerako nazioarteko merkataritza-itunen (TTIP, TISA…) aurkako plataformen artean elkartasunak sortzea behar-beharrezkotzat jo dute.
Euskal Herriko Eskubide Sozialen Karta eta Araba, Bizkaia, Gipuzkoa eta Nafarroako TTIP eta CETAren aurkako plataformak kalera irten dira gaur, itunaren eragin kaltegarriaz ohartarazteko. Hain zuzen ere, elkarretaratzeak egin dituzte Bilbon, Iruñean eta Donostian. Gipuzkoako hiriburuan, gainera, horma-irudi kolektibo bat osatu dute Alderdi Ederren.
CETA itunarekin korporazio handien neurrira egindako legedia sustatuko litzateke; korporazioek merkatuan dituzten azken mugak ezabatuko lituzkete, hain justu. Hortaz, CETA bezalako nazioarteko itun ekonomikoek neoliberalismoan sakontzen dutela nabarmendu dute gaurko protestetan.
Astelehenean, Gasteizen
Astelehenean izango da Gasteizen txanda. Ekainaren 5ean, Europako Gaietako eta Kanpo Ekintzako Batzordea Eusko Jaurlaritzaren egoitzan bilduko da 11:30ean. Valoniako parlamentuko ahaldun Hélène Ryckmansek agerraldia egingo du bertan. Testuinguru honetan, elkarretaratzera deitu dute 12:30erako, Gasteizko Legebiltzarrean. Eta egun berean, ekainaren 5ean ere, 19:30ean, hitzaldi bat antolatu dute Aldabeko zentro zibikoan. Hélène Ryckmansek berak parte hartuko du, beste hizlari batzuen artean.
CETAren aurka mobilizatzeko arrazoi ugari daude, eta horretarako CETA CHECK on-line tresna ere jarri dute eskuragarri. Tresna horrekin, nahi duen edonork bere desadostasunaren berri eman diezaieke itun horien alde dauden alderdietako Euskal Autonomia Erkidegoko eta Nafarroako parlamentariei. Hilabete eskas batean, milaka e-mail bidali dira webgune horretatik parlamentari horien postontzietara.