CAF Beasain, CAF Irun, CAF Power & Automation, Trenasa, CAF signalling Amorebieta, CAF TE Tailerrak eta Rail Line y Geminys enpresetako batzordeek herri palestinarrarekiko elkartasuna berretsi dute, eta nazioarteko legeria errespetatzeko, giza eskubideak ez urratzeko eta Israelekin harreman komertzialak eteteko eskatu diote zuzendaritzari. LABek guztiz babesten du enpresa batzorde hauen iniziatiba.
Uztailaren 1ean Francesca Albanese Palestinari buruzko NBE Nazio Batuen Erakundearen kontalari bereziak bere txostena argitaratu zuen, eta bertan CAF Israelen okupazioaz baliatzen diren enpresen artean sartu zuen. Txosten horren argitalpena, hain justu, Sidenor euskal enpresak Israelekin merkataritza-harremanak eteteko egindako iragarpenaren une berean izan zen, zeina Palestinarekiko euskal ellkartasunaren garaipentzat hartu behar den, LABek nabarmendu duenez.
Albanesek aurkeztutako txosten horrek Israelek Palestinan egiten duen okupazio kolonialaren kontura irabaziak dituzten hainbat enpresa aipatzen ditu, eta aipatutako enpresen artean dago CAF , Jerusalemgo tranbiaren proiektuan parte hartzeagatik. Txostenak zehazki adierazten du mota horretako azpiegituren helburua “koloniak ezartzea eta zabaltzea eta Israelekin lotzea” dela. Txosten horrek ofizializatu baino ez du egin 2018tik enpresa batzordeak salatu duena, eta, ildo horretan, enpresa batzordeak berriro ere bere ezinegona adierazi nahi du. Izan ere, kezkatuta dago konpainia Israelen kolonizazio estrategia zuzenean indartzen duen eta Palestinako herriaren eskubide oinarrizkoenak urratzen dituen proiektu batean inplikatuta dagoelako. Kezka hori gehiago areagotzen du, gainera, proiektuaren legezkotasunak, oso eztabaidagarria baita.
Gainera, aipatutako enpresetako langileak oso kezkatuta daude CAFek proiektu honetan parte hartzeak enpresan bertan eta etorkizuneko proiektuen bilakaeran izan dezakeen eraginagatik, eta berriro ere CAFen zuzendaritzara jo dute, alde batetik, enpresak nazioarteko legearekiko errespetua berma dezan eta bere parte hartzeak giza eskubideen inolako urraketarik eragin ez dezan eskatzeko. Eta, bestetik, Israelekin harreman komertzialak amaitzeko exijitu diote, bereziki, nazioarteko legeriaren arabera legez kanpo okupatutako lurraldeetan.