Busturialdeako Ur Patzuergoa (BUP) Bilbao Bizkaiaren (BBUP) barruan integratzeko izapideen hasiera dela eta prentsan azaldutako berrien aurrean, LABek iritzi publikoari bere jarrera helarazi nahi dio.
• 2012an BUPk lan baldintza duinetan langile propioak hartu eta kudeaketa osoa publikoa izatea lortu zuen. Urte hauetan, partzuergoak aski erakutsi du bere bideragarritasuna eta eraginkortasuna zerbitzua %100ean publikoa izanik. Horregatik, eta kudeaketa eredu honen alde egiten dugulako, ez gaude ados integrazioarekin.
• Bizkaiko Foru Aldundiaren eskutik exekutatzen den EAJen politika salatu nahi dugu, Bizkaiko ur guztiaren kudeaketa BBUPan zentralizatuz. Honek pribatizazio bidean pausu bat suposatzen du, BBUParen eredua gero eta berezko zerbitzu gehiago, azpikontraten bidez multinazional pribatuen esku uztea baita. Gaur egunean horrela dauka beteta bere zerbitzuen %60a. Azken finean, beraien helburua enpresa hauei zerbitzua osorik saltzea da.
• Herritarrekiko hurbila den zerbitzu erabat publiko baten alde egiten dugu, BUPak ordezkatzen duen eredua bezala. Eredu honek uraren kudeaketan erabiltzaileen partehartzea eta beraien interesak defendatzeko aukera ahaldidetzen du, BBUPan ez bezala.
• BUPeko langileen eskubideak defendatuko ditugu. Ez dugu inolaz ere lanpostu horien amortizazio edo pribatizaziorik onartuko, ezta lanpostu horien lan baldintzak okerragotzea. Honetarako beharrezkoak diren neurri guztiak hartuko ditugu.
Aipaturiko arrazoi guzti hauengatik integrazioa bertan behera geratu behar dela deritzogu, langileen eta Busturialdeko herritarren interesak babestuz.