LABek egindako txostenean agertzen diren datuez gain (azterketen noten inguruko ikerketa estatistikoa), egunez egun testigantza gehiago heltzen ari zaizkigu. Antzeko terminoetan mintzatzen dira fakultatibo horiek. Ez gara hitz egiten ari irregulartasun puntualei buruz, baizik eta fakultatibo espezialisten artean ia “guztiz normalizatuta zegoen” jokamolde baten inguruan.
LABek beti egin du apustu Osakidetza publiko, kalitatezko eta gardenaren alde. Eta EPE prozesuak oso garrantzitsuak dira helburu horretan. Horregatik ezin da onartu halako praktika irregularrak egotea denona den osasun sistema publikoan.
Zentzu honetan eta egoeraren larritasuna kontuan hartzen, Osakidetzako Zuzendariak komunikabideetan iragarri berri duen hiru kategorien paralizazioa ez da nahikoa. Horregatik, berriro ere eskatzen dugu fakultatibo espezialisten kategoria guztien prozesua gelditzea, ikerketa sakona eta inpartziala abian jartzea, ez soilik Osakidetzan baita HAEEn ere, eta gertatu denaren gaineko erantzukizunak eskatzea dagokien pertsonei, maila guztietan.
Ulertzen dugu gai delikatua dela eta horregatik, LAB sindikatutik zuhurtasunez jokatzen ari gara, baina Osakidetzak ez digu orain arte inolako azalpenik eman. Horregatik, Darpon jaunari eskatzen diogu agerpen mediatiko gutxiago eta jardun serio gehiago.