Gaurko Mahai Orokorraren bileran Eusko Jaurlaritzak beste petatxo bat aurkeztu du, langileen erretiro eta errelebu eskubideen kontra Madrilek egindako murrizketen testuinguruan. Berriro ere Estatuak uzten dion zirrikitu bat probesten du Jaurlaritzak murrizketa bat arintze aldera, ohiko jokoa erabiliz: murrizketen errua Madrili bota, eta kalteak arintzearen itxurak lorpen propio gisa saltzen du Jaurlaritzak.
Estatalizazioaren eta Negoziazio Kolektiboaren ukazio kasu honetan zera gogoratu behar da gainera, PSOEk CCOOreki adostutako pentsioen erreforma murriztatzailean duela iturria Hegio Euskal Herrian greba orokor batekin erantzun zitzaiona. Inork garai berriak datozela pentsatzen badu, datu honi begiratzea dauka.
LABen ustez Eusko Jaurlaritzak planteatutako proposamena guztiz partziala da, eragin mugatuarekin, eta murrizketak kudeatzeko helburu hutsarekin: Batetik, ez ditu funtzionarioak kontuan hartzen, behin behinekoak ere ez. Bestetik, Madrilek ezarritako pentsioen erreformaren eraginak ez ditu gainditzen, aurre-erretiroa hartzeko epeei eta pizgarriei begira. Noiz eta Euskal Herriko enplegu publikoak prekarietate eta murrizketa egoera larriak pairatzen dituenean.
Agenda propioa garatzeko exijitzen diogu Eusko Jaurlaritzari eta hau sostengatzen duten EAJ eta PSE alderdiei. Agenda horretan enplegu publikoaren gaiari fundamentuz plan integral baten bidez heldu behar zaio. Enplegu Plan Integral horretan jaso behar dira langileen aurrejubilazioak, baita egonkortasuna eta behar eta nahi ditugun kalitateko zerbitzu publikoak hornitzeko enplegu maila nahikoa ere.