LABek, gaur goizean Eusko Jaurlaritzaren Hezkuntza Sailak aurkeztutako “Hezkuntzaren Aldeko Akordioaren Oinarriak” dokumentuaren gainean egiten duen urgentziazko balorazioa laburra duzue ondokoa:
– Prozesu parte hartzailegoa behar da. Ituna lortzeko prozesuarekin kritikoak gara, parte hartzaileagoa izan eta medioei begira baino hezkuntza komunitatean hausnarketa sakona egitera bideratuagoa egon beharko litzateke. Gaurko aurkezpena da gure kritikaren erakusgarri, dokumentuaren inguruan iritziak jasotzera bideratu baino, medioetan produktua saltzea izan da helburua. 46 orriko dokumentu bat aurkeztu zaigu, aurrez aurkezpenean egon garen 30 eragileei aurkeztu gabe. Ondoren, Hezkuntza Sailaren balorazioa izan da oro har eragileok ontzat jo dugula dokumentua, mamiaren inguruan eragile batek ere ez duenean ezer esan, aztertzeko tarterik ez dugulako izan.
– Burujabetza, konpetentzia guztiak, autogobernu osoa. Parte Hartze prozesuan lantzen den dokumentua ezerezean ez gelditzeko bermeak eskatzen ditugu. Hau da, egiten den parte hartze prozesua askatasunean eta Espainiaren betorik gabe egin nahi dugu. Hezkuntza komunitateak eta instituzioek askatasunez erabakitzen dutena praktikara eramatea eskatzen dugu, ez besterik. Zentzu honetan, Espainiaren inposaketei aurre egin eta gure hezkuntza sistema burujabea irutea ezinbestekoa da. Adibidez, nola egin eraldaketa pedagogikoa eta konpetentzietan oinarritutako hezkuntza, Madril errebaliden bitartez azterketa bidezko selekzioaren eredua muturreraino eramaten ari denean?
– Baliabideak behar dira. Madrilen betoak gaindituta ere zer egingo du Eusko Jaurlaritzak? Proposatutako aldaketak praktikara eramateko ikastetxeak, bereziki eskola publikoak, baliabidez hornitzea (ekonomikoak eta humanoak) eta ganorazko formakuntza eskaintzea ezinbesteko neurriak dira, beste askoren artean. Hezkuntzari, gure herriaren garapenerako lehen mailako estatusa onartu behar zaio eta horretarako, askoz ere gehiago inbertitu beharra dago.
– Kontrako norabidean goaz. Cristina Uriarteren hitzek soinu ona ateratzen dute, baina Hezkuntza Sailaren politikak kontrako norabidean doaz: murrizketak eta inbertsio falta; Madrilen esanetara hartutako neurriak (errebalidak, oposaketa eredua,…); hizkuntza ereduak gaindituko dituen murgiltze eredua ezartzea atzeratzea; segregazioaren aurkako neurri eraginkor falta,…