Langile bat hil da Laudioko Tubacexen gaur, lanean ari zela, makina batek harrapatua.Prestakuntza dualeko ikasle izandakoa, denbora gutxi zeraman Tubacexen kontratupean, eta bakarrik ari zen lanean, bere esperientzia txikiarekin printzipioz bakarrik ezin egingo lituzkeen lanetan. LABek bere elkartasuna eta babesa erakutsi nahi dizkie lankide, senide eta ingurukoei, eta baita langile-klaseari ere, bere osotasunean.
Gaurkoarekin, gutxienez 26 dira urte hasieratik Euakal Herrian lanean hildako langileak.
Honetaz aparte, istripu larria gertatu da Aernnovak Berantevillan duen lantegian. Langile bat altueratik erori da, honezkero aldatuta egon behar zuen grada batetik, hain zuzen ere. Langileen kexei esker lortu zen, hain zuzen ere, berau aldatzeko konpromisoa.
Tubacexeko lankideek Laudioko lantegiaren ekoizpena gelditu dute eta adierazi dute heriotza hau ezin zaiola doan atera enpresaren zuzendaritzari. Prebentzio neurri eraginkorrak eskatu dituzte.
Bihar, uztailaren 5ean, egun osoko greba egingo dute Laudion Tubacexek duen lantegian, eta 12:00etan, kontzentrazioa egingo dute enpresa atarian, ondoren, manifestazioan abiatuko dira Laudioko Herriko Plazaraino.
LABek dei egiten die langileei heriotza honen aurrean antolatutako erantzun-deialdietan parte hartzera, mobilizazioaren beharra azpimarratuz, lanetik etxera bizirik eta osasunez bueltatzeko eskubidearen alde.