Datorren maiatzaren 23an grebarako joko dugu Bizkaiko metalgintzako langile guztiok. Erakutsiko diogu patronalari gure eskubideekin ez dela jolasten. FVEMek aste honetan, greba deialdia ezagutu ondoren publikoki esan du ez dela serioa grebak deitzea plataformak aurkezten direnean. LABetik erantzuten diogu ez dela serio Bizkaiako metalgintzak 10 urtez soldata izoztuta izatea 2017an bezala patronala aberasten ibili den bitartean.

Gaur egin da Bizkaiko metalgintzako mahai negoziatzailearen 18. bilera. Aurretik, pasa den maiatzaren 10ean, Bizkaiko metalgintzako mahai negoziatzaileak ordezkatuta gauden sindikatuok plataforma bateratua erregistratu genuen, eta patronalaren erantzuna negoziazioa blokeatzean jarraitzea izango zela aurreikusiz, sektore osorako 5 greba egun erregistratu genituen, lehena maiatzaren 23an.

Erratuta ez geundela erakutsi digu gaurko bilerak. FVEMentzat, hilabeteak sindikatu guztion plataforma bateratua eskatzen egon ondoren, ez da nahikoa ELA, CCOO, LAB eta UGTk emandako urratsa. Gaurko bileran ez dio plataforma bateratuari erantzunik eman eta argipenak eskatu eta eskari batzuk onartezinak direla esatera mugatu da. Beste behin ere patronalak erakutsi du interesatzen zaion bakarra dela sektoreko langile guztien lan- baldintzak prekarizatzen jarraitzea dela interesatzen zaion bakarra. Sindikatuok argi erakutsi dugu maiatzaren 23ko lehen greba eguna baino lehenago biltzeko gure prestasuna, eta FVEMek uko egin dio honi, hurrengo bilera ekainaren 6an jarriz. Hau da negoziatzeko duten borondatea.