Vibrantz enpresan, Laudioko pintura-ekoizpenean diharduen enpresan, mantentze-lanetako langile bat matxuratutako labe bat konpontzen ari zen istripua gertatu den unean. Labearen leherketak bete-betean harrapatu du 49 urteko J.B.V. langilea.
Urtea hasi zenetik, 33 dira Euskal Herrian lan-istripuz hildako langileak. Patronala absentismoaren inguruko mamua zabaltzen ari den bitartean, hildako langileen zerrenda loditzen doa. Gogorarazi behar dugu urtero Euskal Herrian larritasun ezberdineko 100.000 lan-istripu inguru aitortzen direla ofizialki. Datuak gordinak bezain latzak dira: prebentzioaren integrazioa ez da gauzatzen, eta enpresek inpunitate osoz jokatzen jarraitzen dute, instituzioen konplizitatearekin. OSALANek enpresetan presentzia izan beharrean, komunikabideetan iragarritako ekintzekin justifikatzen du bere jarduna, milaka euro publiko xahutuz.
LABek EAEko zein Nafarroako gobernuei eskatzen die enpresetan indarrean dagoen araudia betearaz dezatela, marketin-kanpainak alde batera utzita.
Bihar, 11:30ean, elkarretaratzea enpresaren atarian
LAB sindikatuak bat egiten du Vibrantz enpresako batzordeak egindako deialdiarekin. Era berean, Aiaraldeko Greba Batzordeak arratsaldean egingo duen mobilizazioarekin ere bat egingo du.