Atal sindikaletik alegazioak aurkeztu zizkioten aurrekontuari, eta horiek negoziazio mahaira eraman ez izana negoziazio kolektiboaren gutxiespentzat jo du.
Une honetan asko dira Barakaldoko Udalean etenda dauden gaiak, aurrekonturik gabe edo aurrekontu eskasarekin: behin-behinekotasuna murriztea, Pertsonen Plana, egonkortze prozesua, hitzarmena, 2023ko Enplegu Publikoko Eskaintza, lanpostuen balorazioa, Barne Berdintasunerako II. Plana betetzea, telelana, Euskararen erabilera normalizatzeko plan estrategikoa (2023-2027) abian jartzea… Gai horiek guztiak lege-eskakizunekin, Lan ikuskarien errekerimenduekin, auto judizialekin eta osoko bilkuraren erabakiekin lotuta daude. Bada, gai horiek eragin handia daukate herriko zerbitzu publikoen kalitatearengan, udaleko lankideen lan-baldintzetan nahiz karrera profesionalean.
Hala, LABek kritika egin dio gobernu-taldeak aurkeztutako 2024rako Barakaldoko Udalaren Aurrekontu Orokorren proiektuari; izan ere, proiektua ez da Negoziazio Mahaira eraman, informazioa, eztabaida eta adostasuna lortzeko. Badirudi gobernu-talde honek gai askori modu positiboan heltzeko borondaterik ez duela.
LABeko Atal Sindikalak azpimarratu du aurrekontu horien onarpenak eskubide sindikalen eta, bereziki, negoziazio kolektiboaren gutxiespena dakarrela berekin, eta Gobernu Taldeak horiek Negoziazio Mahaira eramaten ez baditu udal aurrekontua baliogabetzeko moduan jarriko luketela. LABek ez du udal langileen eskubideak urratzen dituzten aurrekontu hauen onarpenaren erantzule izan nahi.
LABek gogorarazi du aldez aurretik alegazioak aurkeztu direla, eta Gobernu Taldeak Barakaldoko Udaleko langileen ordezkaritzari entzungor egiten jarraitzen badu, gure lankideen eskubideak urratzen dituzten gai guztiak auzibidean aurkaratzen jarraituko duela. Hala, Barakaldoko Udalaren 2024ko ekitaldirako aurrekontuak baliogabetu eta ondoriorik gabe gera daitezke. Gobernuaren benetako borondateak bakarrik uxa dezake blokeoaren eta etengabeko auziaren errealitate hori, egitate positiboetan eta aurrerapenetan azalduta.