Euskal Herriko Eskubide Sozialen Kartak, bertan gauden eragileon babesarekin, Eusko Jaurlaritza aplikatzen ari den poli-tika antisozialak salatu nahi ditu gaur, Gasteizko Legebiltzarraren aurrean. Hain zuzen ere, politika hauek biztanleriaren gehiengoaren pobretzea dakarte, gutxiengo bat aberasten den bitartean, eta halaxe nabarmendu dugu gaur, Pobreziaren Kontrako Nazioarteko Egunean.
Euskal Herriko Eskubide Sozialen Kartak deitutako mobilizazioa Gasteizko Andra Mari Zuriaren plazatik abiatu eta Gasteizko Legebiltzarrean amaitu da. Deitzaleon hitzetan, badira alternatibak murrizketek ekarrirako pobrezia igoera ekiditeko. Inposatu nahi zaigun bazterketa sozialaren eta bizitzaren prekarizazioaren aurrean gure apustua Babes Sozialerako Euskal Sistema publiko, duin eta kalitatezkoa da. Murrizten ez duen sistema bat. Kalitatezko prestazio eta zerbitzuak bermatzen dituen sistema bat, bizitza proiektu duin bat aurrera eramatea ahalbidetzen duena.