2024-02-27
HomeEkintza SindikalaArrasateko lorezainen lan baldintzak duintzea #LortuDugu, 70 eguneko grebaren ondoren

Arrasateko lorezainen lan baldintzak duintzea #LortuDugu, 70 eguneko grebaren ondoren

70 greba egun eta gero, Arrasateko lorezainek eta Prezero enpresak akordio bat sinatu dute, langileen lan baldintzak duinduko dituena.

Akordioaren eduki nagusiak honako hauek dira:

-Urteko lan jarduna 50 ordu murriztu

-Soldata ekiparazioa

-Urteko KPI igoerak

-Baimenetan hobekuntzak

-Lan erreformaren aurkako blindatze klausulak

Agerian geratu da berriro borrokak merezi duela. Hala adierazi dugu gaur egindako agerraldian, eta Arrasateko herria zoriondu dugu, norbanako, talde, eragile zein kolektibo asko lehen egunetik ibili direlako lorezainen aldarriak babesten.

Lan gatazka honen atzean azpikontratazioa dago. Horren ondorioz, zerbitzu pulikoak enpresa pribatuen esku uzten dira, horrek dakarren prekaritatearekin. Hori dela eta, aurrera jarraituko dugu borrokarekin, langile guztien duintasun eta berdintasun baldintzak berma daitezen. Estatuko hitzarmenek arautzen dituzten lan baldintzak hobetzen jarraituko dugu LABetik.

LABen oharra, gaur egin dugun agerraldiaren harira:

Lortu dugu! 70 eguneko grebaren ondoren, Arrasateko lorezainek gaur lan akordioa sinatu dute. Arrasateko Lorezaintza zerbitzuan lan egiten duten langileen  lan baldintzak duintzea lortu dugu. Akordioaren edukiak, besteak beste, honakoak dira: urteko lanaldia murriztu (50 lan ordu gutxiago urtean ); ordaindutako baimenetan hobekuntzak; langileen soldaten arteko ekiparazioa plus ezberdinen bitartez orain arte langileen artean zegoen diskriminazioa ezabatu; KPIaren araberako igoerak datozen 4 urteetarako, eros ahalmena bermatuz; eta hau guztia, Espainiako lan erreforma ekiditzeko klausula bereziekin.

Lehenik eta behin, LAB sindikatuak langileak zoriondu nahi ditu, erakutsitako duintasuna eta borrokak lorpen hau lortzeko  balio izan duelako eta beraien borrokari esker lortu dugulako akordio hau. Baita ere, eta nola ez, Arrasateko herriari. Norbanako zein talde, eragile eta kolektiboei, lehen egunetik gure aldarrikapenekin bat egin duzuelako, langileoi babesa eta elkartasuna adieraziz. Grebaren egun bakoitzean zuen indarra sentitu dugu, eskerrik asko!

Hala ere, gure lana ez da hemen amaitzen. Azpikontratazioaren ondorioz, zerbitzu publikoak enpresa pribatuen esku geratzearen aurka azalduko gara eta langile guztien duintasun eta berdintasun baldintzak berma ditzaten lanean jarraituko dugu. Hitzarmen estatalek arautzen dituzten lan baldintzak hobetzen jarraituko dugu. Ez ditugu langileak prekaritate egoeran lanean aritzea onartuko, eta LAB sindikatuak horretan lanean jarraituko du. Langileen eskubideen defentsan, borrokak merezi duelako!

AZKEN ALBISTEAK | ÚLTIMAS NOTICIAS

Martxoaren 3ko ekintza bateratuak aurkeztu ditugu

Datorren igandean betetzen dira 48 urte martxoaren 3ko sarraskitik. Eta gaur, agerraldia egin dugu LAB, ELA, ESK eta STEILAS sindikatuok, Martxoak 3 elkartearekin batera, igandean egingo ditugun ekintzak aurkezteko. 12:00etan, ekitaldia egingo dugu Plazan, monolitoaren ondoran, eta 12:30ean, bertatik abiatuko da Gasteizko kaleak zeharkatuko dituen manifestazioa.

Osakidetza eta garbiketa enpresa esleipendunei eskatzen diegu uztailean sinatutako aurreakordioa bete dezatela

Joan den udan, Osakidetzak azpikontratatutako garbiketa-zerbitzuko langileek egindako borroka eredugarri eta duinaren ondoren, enpresa esleipendunak eta gehiengo sindikala aurreakordio batera iritsi ginen. Bertan, sektoreak hitzarmena berritzeko egin zituen aldarrikapen nagusiak jaso genituen: bertako langileen baldintzen homologazioa blindatzea, karrera profesionala eskuratzea, txanda-kontratua eskuratzea, bakanteen arautzea…

LABek Nafarroa Garaian inoizko emaitzarik onenak lortu zituen 2023ko hauteskunde sindikaletan: 1.223 delegatu ditu eta %18tik hurbil dago

Nafarroako Gobernuak azkenean zabaldu dituen emaitza ofizialen arabera, LAB sindikatuak maximo historikoak lortu zituen 2023ko hauteskunde sindikaletan. Azken datuen arabera, LABek 1.223 delegatu ditu Nafarroa Garaian, eta %17,96ko ordezkaritza. Lau sindikatu nagusien artean, azken urtean LAB izan da delegatu kopuru gehien lortu dituena, bai eta ehunekoan gora egitea lortu duen bakarra ere.