Azaroaren erdialdean ibilbide garrantzitsu bati ekin genion Amurrioko kiroldegiko langileen grebaren hasierarekin bat eginez: Amurrioko Udalean mahai baten osaerarako eskaera sartu genuen azpikontratetako langileen lan-baldintzak kezkatuta. Atzo, hilak 24, burututako Udalbatzan eskaera hori gauzatzearen alde bozkatu zuten aho batez alderdi guztiek. Bide honetan emandako urrats txiki bakoitza garrantzitsua dela uste dugu; izan ere, ELA eta LABek adostutako mozioa Udalbatzara eramatea lortu da komite osoaren babesarekin (ELA, LAB eta CCOO) eta alderdi guztien oniritziarekin.

Horrelako adostasuna duen testua lortzeko, jakina, bakoitzak bere aldetik zerbait jarri behar izan du; horrek aitorpena merezi du eta bide onetik goazela uste dugu.

Elkarlanak duen garrantzia azpimarratu nahiko genuke; izan ere, guztion nahia bada langileen lan-baldintzak eta zerbitzuaren kalitatea ahalik eta hoberenak izatea, guztion lana ezinbestekoa izango da.

LABen argi daukagu, zerbitzu publikoak langile publikoek bete beharko lituzketela, eta horren alde lanean jarraituko dugu aurrerantzean ere. Gaur-gaurkoz izaera publikorik ez duten lanpostuak ugariak direnez, ordea, pleguetan klausula sozialak barneratzea nahitaezkoa da; eta horiek bildu ditugu ELAk eta LABek adostutako mozioan. Tartean, nabarmentzekoa, 1.200 euko soldata garbia eta astean 35 orduko lanaldia ezartzeak ekarriko lukeen azterketa burutuko dela pixkanaka neurri horiek ezartzeko helburuarekin.

Ibili beharreko bidea ez da motza izango, erraza ere ez. Hala ere, borondatea eta lanerako prestutasuna baldin badaude, ziur gara hau bezalako adostasun puntu gehiago lortuko ditugula.