LABek urteko Delegatuen Batzarra burutu du gaur Donostiako Atano III.ean sindikatuaren urte honetarako erronka eta borrokak aurkezteko.
Batzarrari hasiera 2011n lan istripuan hildako langileak gogora ekarriz (80tik gora) eta prekarietatea salatuz eman zaio. Jarraian Garbiñe Aranburu, LABeko ekintza sindikaleko arduradunak, besteak beste, Madrilen COE, CCOO eta UGTren artean adostutako aurreakordioak dakartzan eskubide urraketak salatu ditu.
Euskal Presoak ere presente egon dira aurtengo Batzarrean, Amaia Esnalek, Egin dezagun bidea ekimenaren izenean, presoen eskubideak errespetatuak izan daitezen langileok eta gure borrokak duen indarra azpimarratu du.
Batzarrari Ainhoa Etxaide, LABeko idazkari nagusiak eman dio amaiera. Bere interbentzioan beharrezko ditugun aldaketa politiko eta ekonomikoak prozesu baten emaitza izango direla aipatu du eta horretarako beharrezkoa dela lan amankomun bat egitea, akordioak lortzea eta aliantzak egitea. Aliantzak eremu bakoitzean eta aliantzak eremu politiko, sindikal eta sozialean.
Batzarraren ostean LABeko Delegatuak manifestazioa egin dute Donostiko kaleetan zehar "Burujabetza politiko eta ekonomikoa Euskal Herriak etorkizuna izan dezan" lemapean.
