2026-11-16
HomeEkintza SozialaHelduak eta PentsiodunakAhalmen legegile osoa aldarrikatu dugu babes sozial gaietan, pentsioen sistema propio bat...

Ahalmen legegile osoa aldarrikatu dugu babes sozial gaietan, pentsioen sistema propio bat eraikitzeko

Bizkaiko Pentsiodunen Mugimenduak manifestazio bat egin du Bilbon, “Pentsio blindatuen alde, pentsio publiko duinak” lemarekin, Pertsona Helduen Nazioarteko Egunaren harira deitutako mobilizazio sorten barruan. Bilboko manifestazioa Plaza Eliptikotik irten da, eta bertan izan da LABeko idazkari nagusi Garbiñe Aranburu, pentsiodunei babesa emateko. 

Garbiñe Aranbururen hitzetan, pentsio sistema publikoa jasotzen ari den erasoak erantzuna behar du, eta, zentzu horretan, eredugarria da pentsiodunen borroka: "Mobilizazioari esker, borroka honi esker, emaitza batzuk lortzeko aukera ireki dute. Ikusi beharko da orain Toledoko Itunaren letra txikia zein den eta nola gauzatu nahi duten, baina bistan da akordio hori mobilizazioei esker lortu dela". Hori bai, LABeko idazkari nagusiak nabarmendu du Toledoko Itunaren akordioa ez dela nahikoa, sindikatuak berak joan den astean egindako irakurketan ohartarazi bezala.

Garbiñe Aranburuk adierazi du pentsiodunen plataformetatik egiten diren aldarrikapen guztiekin bat egiten dugula: hala nola, sindikatuak eskatzen du lan eta pentsio erreformak bertan behera geratzea; 1.080 euroko gutxieneko pentsioa; pentsio arrakala murriztea; eta 1.200 euroko gutxieneko soldata, "gaur egungo soldata ez duinak biharko pentsio ez duina ekartzen duelako".

Sindikatu gisa, bi erronka ditugula berretsi du: "Alde batetik, pentsiodunen borroka langile klasearen borroka bilakatu nahi dugu, gaurko pentsiodunak eta etorkizuneko pentsiodunak elkarrekin mobilizatzea, alegia; beste aldetik, sistema propio baten aldeko aldarrikapena indartu nahi dugu". Azken honen harira, Garbiñe Aranburuk garbi dauka Toledoko Itunetik eta Madrilgo Kongresutik ez dela alternatibarik etorriko: "Bitarteko juridiko eta politikoak aldarrikatzen ditugu, ahalmen legegile osoa eskatzen dugu babes sozial gaietan, pentsioen sistema propioa eraikitzeko".
 

 

 

AZKEN ALBISTEAK | ÚLTIMAS NOTICIAS

Leioako Foru Egoitzako langileak grebara doaz lankide falta eta baldintzen okertzea salatzeko

Azaroaren 16an deitu dute greba; izan ere, zuzendaritzak planteatutako langile-kopurua ez da nahikoa, lan-baldintzak okertu egin dira eta zuzendaritzak ez du zentroaren benetako beharrei erantzungo dien lanpostu-zerrenda negoziatu nahi.

Mobilizazioaren indarrak mugitzera behartu du Osakidetza, baina proposamenak oraindik ez dira nahikoa

LAB, SATSE, ELA, CCOO eta UGT sindikatuok balioetsi dugu urriaren 30eko greban profesionalek emandako erantzun irmoak Mahai Sektorialean posizioak mugitzen hastera behartu duela Osakidetzako...

Nafarroako Industria Foru Lege berriak inbertitzaile pribatuak lehenesten dituela kritikatzen dugu, baina ontzat jotzen ditugu jabetza publikoa, deslokalizazioa eta lanaldiarekiko aurrerapenak

Parlamentuak atzo onartutako Industria Foru Lege berriak inbertsio pribatua erraztera bideratuta dago, pizgarri, sinplifikazio administratibo eta kanpoko inbertitzaileak erakartzera bideratutako bestelako neurrien bidez. Hala...