Gaur, Urtarrilak 24, Gipuzkoako metalgintzako hitzarmenaren negoziazio mahaiko laugarren bilera izan dugu sindikatuok patronalarekin. ADEGIk mahai gainean ipini dituen puntu atzerakoi eta murriztaile guztiak bere horretan diraute eta negoziazio prozesua blokeo egoera batera eramaten ari da.
LABetik, patronalari berriro ere esan diogu, gu gure plataforman aldaketak egin eta malgutasunez jokatzeko prest gaudela, beti ere atzerapausurik suposatuko ez lukeen hitzarmen bat lortzeko helburuarekin. ADEGI-ri galdetu diogu ea guk aldaketak eginez gero, bera prest ote dagoen bere plataforma aldatzeko eta beraien erantzuna honakoa izan da: “Zuek egin aldaketak eta ikusiko da zer gertatzen den.”

ADEGI, akordio bat lortzeko borondatez ibili beharrean, Madriletik etorriko den Lan Erreformari begira dagoelakoaren susmo gero eta handiagoa daukagu.

Hurrengo bilera, Urtarrilaren 31n izango da eta patronalaren jarrera aldatu ezean, beste behin ere Gipuzkoako metaleko langileok kalera atera behar izango gara gure eskubideak defendatzeko. ADEGIren esku dago eskenatoki horretara ez iristea. LABetik, orain arte egin dugun bezala, arduraz jokatuko dugu.