Osasun krisia hasi denetik bi salaketa sartu ditu Sestaoko Udaleko LABeko atal sindikalak Lan Ikuskaritzan Juan Ellacuria egoitzaren egoera dela eta, apirilaren 3an eta apirilaren 29an, hurrenez hurren. Lehendabizikoa, langileentzako segurtasun neurriak eskatzeko sartu genuen, egoitzak ez baitzien behar zuten ekipamendu nahikorik ematen. Bigarrena, egoiliarren artean positiboak egonik, ez zutelako protokoloak eskatzen duen beharrezko sektorializazioa gauzatzen, arriskuan jarriz bai artatzen dituzten langileak zein gainontzeko egoiliarrak.
Aste honetan, berriro publikoki salatu behar ditugu bai udal egoitzaren gerentziaren jarrera zein udalarena. Biek ala biek bazekiten urtarriletik gaixotasun kutsakor brote bat zegoela egoitza honetan eta informazio hori ezkutatu egin diete langileei. Ezin dugu aipatu gabe utzi COVID-19aren pandemia hasi denetik 34 langile eta 43 egoiliar suertatu direla kutsatuta birusarekin. Are gehiago, egoiliarren artean soilik, 15 hildako egon dira egoitza honetan.
Sestaoko Udaleko LABeko atal sindikalak Juan Ellacuría egoitzaren gerentzia salatu nahi du negligentzia guzti hauengatik. Jarrera opakoa eta oztopatzailea arriskuan jartzen ari dira etengabe egoitzako langileen osasuna, baita bertan bizi diren pertsonena ere. Gure osasun eskubidea aldarrikatzen dugu, eta gure lana baldintza seguruetan egin ahal izateko informazio osoa eta beharrezkoak diren neurriak har ditzaten exigitzen diegu. Aski da! Gure osasuna da lehentasuna.