Nafarroako Gobernuak neurri sorta bat prestatu du Nafarroako Foru Administrazioan ezartzeko, COVID-19 birusaren ondoriozko egoerari aurre egiteko asmoz. Neurri horiek unean uneko egoeraren arabera ezarriko dira.
Lehendakaritzako, Berdintasuneko, Funtzio Publikoko eta Barneko kontseilariak emandako foru agindu baten bidez, neurri sorta bat onartu da COVID-19 birusaren ondoriozko egoerari aurre egiteko. Gobernuak sindikatuei jakinarazitako neurrietako batzuk berehala aplikatuko dira; esate baterako, fitxaketa ordenagailuaren bidez egitea eta ez hatz-markaren bidez, edo premiazkoak diren kontratazioak baizik ez egitea. NAPIko eta Segurtasun Eskolako ikastaroak ere atzeratu dira, online egiten direnak izan ezik.
Administrazioan sartzeko probei dagokienez (hala oposizio bidezkoak, nola kontratazio zerrendak osatzekoak), kasuak banan-banan aztertuko dira. Atzeratzen ez badira, prebentzio neurri bereziak ezarriko dira (izangaiei multzoka deitzea, gela gehiago jartzea, mahaien eta pertsonen arteko distantzia handitzea eta abar).
Langileak isolatzeko erabakia hartzen bada, Gobernuak esan du lansarien %100 kobratuko dela. Ikastetxeak ixten badira, erraztasunak emanen dira Nafarroako Foru Administrazioan lan egiten duten gurasoek lanaldia malguagoa izan dezaten edo baimenak har ditzaten.
Planean aurreikusten den beste neurri bat da telelana ezartzea etxetik lan egin dezaketen langile guztientzat. Neurri hau mailaz maila ezarriko da, beharren arabera.