Euskal gehiengo sindikaletik babesa erakutsi diegu Zaldibar Argitu plataformak martxoaren 12rako deitutako mobilizazio eta lanuzteei. Eguerdian, zabortegiaren inguruko herrietan egindako manifestazioetan izan gara. LABeko Exekutiboko kide Edurne Larrañagaren hitzetan, "ezinbestekoa da krisi hau eragin dutenen erantzukizuna mahai gainean egotea. Honek ezin du dimisiorik gabe amaitiu".
LABeko ordezkaritza bat Eibarren deitutako manifestazioan izan da, idazkari nagusi ondoko Igor Arroyo eta Exekutiboko kide Edurne Larrañaga eta Endika Perez buru.
Edurne Larrañagaren esanetan, "premiazkoa da Alberto eta Joaquin aurkitzea; premiazkoa da herritarren osasuna bermatzeko neurri eraginkorrak hartzea; premiazkoa da Zaldibarreko zabortegian lanean ari diren langileen eskubideak bermatzea".
LABeko Exekutiboko kidearen arabera, "eredu sozioekonomikoaren inguruko gogoeta bat zabaldu behar dugu. Zaldibarren gertatu denak bizitza arriskuan jartzen du, eta guk bizitzaren alde, eredu sozioekonomiko berri baten alde, aurrera egin behar dugu”.