Goizean Baionako karriketan izan da Ipar Euskal Herriko mobilizazio nagusia, eta LABeko kideok bertan izan gara ozen esateko Macron gobernuaren eskutik langileen bizi-baldintzek okerrera baino ez dutela egin eta badela garaia langileoi boterea emateko eta erabakiak hartzeko guneak gure lurraldean lan egiten duten eta hemen bizi diren pertsonengana hurbilaraztea.
Zerbitzu publikoen suntsiketa, gizarte-prestazioen eta funtzionarioen indize punduaren izozketa, lan-baldintzen okertzea… Etxebizitza, elikagaiak, hilabeteroko produktuak, erregaia eta bestelako energia-iturriak eskuratzea gero eta zailagoa da, edo ezinezkoa kasu ainitzetan. Gero eta pertsona gehiagok hautatu behar dute jan, etxea berotu edo osasun-arreta jaso. Eta zer erran aisialdiaz, kirolaz eta kulturaz gozatzeko aukeraz.
Bien bitartean, aberatsek aberastasuna pilatzen eta bereganatzen segitzen dute, informazioa beren interesen arabera kontrolatzen dute eta, Macron-i esker, zergei ihes egin eta zerga-egoitza atzerrira eraman dezakete, lasaitasun osoz.Onartezina da patronalaren aldeko politika neoliberalek utzitako eragina, eta herriak argi esan du: nahikoa da.
Gaurko greba orokorra eragina nabarmena izaten ari da goizetik Ipar Euskal Herrian. Eguneko hitzordu nagusia Baionan eginiko manifestazio jendetsua izan da, eta LABeko kideok gure aldarrikapenak karrikara eraman ditugu:
- Lan sari guztien igoera orokorra.
- Indize punduaren izozketa bertan behera uztea.
- Gutxieneko lan sari eta gizarte-laguntza guztien igoera.
- Zerbitzu publikoetarako baliabide gehiago.
- Multimilionarioei eta milioidunei beren aberastasunaren araberako zergak plantan jartzea.
Horrez gain, LABen ustez, tokiko alternatiba bat eraiki behar dugu. Horregatik, Ipar Euskal Herri mailako negoziazio kolektiborako guneak sortzea aldarrikatzen dugu. Maila horretan, patronalari aurre egiteko gure aldeko indar-harremana eraikiko dugu, gure bizi- eta lan-baldintzak benetan hobetzeko. Hemen lan egin, hemen erabaki!
