Gaur egun indarrean dagoen dekretua onartu zenean LABek hainbat proposamen eginzituen gurasotasun baimen hori modu eraginkor batean politika feministak aurrera eramateko baliagarria izan zezan. Gobernuak orduan ez zuen bat bera ere onartu eta propaganda instituzional hutsa egiteko erabili zuen neurri honen inguruan zebilen guztia. Aurkeztutako proposamen horien artean, gurasotasun baimena guraso bakarren kasuan bikoitza izatea eskatzen genuen, familia eredu guztiek eskubide berdinak izan ditzaten. LABek Mahai Orokorrean gai hau erdigunean jarri zuen baina gobernuak ez zeukan benetako negoziaziorik abiatzeko asmorik.
Gaurko iragarpena ikusita, gobernuak berdintasun gaiekin zerikusia daukaten neurriekin propaganda egten jarraitzen duela agerikoa da. Mahai Orokorrean gauden sindikatuekin ez du inolako negoziaziorik abiatu, zoritzarrez azkenaldian behin eta berriz egiten duen bezala.
Gainera, planteatzen duen 6 asteko luzapen horrekin ez da gure ustez familia ereduen artean egun dagoen diskriminazioarekin bukatuko. Erabat salagarriak dira neurria justifikatzeko erabiltzen dituen argudioak, berdintasun politikak zuzenean jaiotze tasarekin lotuz eta eskubideak mesede bezala erabiliz. Kontziliazio neurriak korresponsabilitatearen ikuspegitik pentsatuak izan behar dira eta zaintza lanak zerbitzu publikoetatik bermatu, bestela ez dira politika onargarriak.
Ez da kasualitatea ordea gaur gobernuak iragarpen hau egin behar izatea. Geroz eta presio gehiago dago mugimendu feministaren eskutik aldarrikatzen diren neurriak politika publikoetan eragina izan dezaten. Nola ez, Eusko Jaurlaritza oso urduri dago hurrengo ostegunerako urtarrilak 30 deituta dagoen Greba Orokorrak izan dezakeen arrakasta dela eta. Gaurko iragarpena ikusita, langileok grebarako hamaika arrazoi ditugula garbi dago, baita politika feminista eraginkorrak aldarrikatzeko ere.
Urtarrilaren 30ean denok grebara.