Gaur, asteazkena, lan istripuz hildako langile berri baten heriotza salatu behar dugu. Olaberriako Arcelor enpresan gertatu da. LAB sindikatutik, lehenik eta behin, elkartasuna adierazi nahi diegu hildakoen senide, lagun, lankide eta gertuko guztiei. Modu berean gogor salatu nahi dugu heriotz berri honekin, Hego Euskal Herrian, 2020. urtea hasi berri den honetan, hildako zazpigarren langilea dela.
Lehen datuen arabera, hildako garraiolaria zamalanak egiten ari zen eta ibilgailua gainera etorri zaio, eta beste kamioi baten kontra zanpatu du. Garraiolaria berehala zendu da. Antzekotasun handiko beste istripu bat gertatu zen lantegi berean, Olaberrian, 2013an. Beste garraiolari bat hil zen orduan.
Hau guztia dela eta, LAB sindikatutik mobilizatzera dei egiten dugu, guztien artean, langile zein jendartean, sarraski hau geldiarazi dezagun. Non daude Gasteizko Gobernuko arduradunak heriotz hauek salatzeko? Zein aldaketa eta zein pauso emateko prest daude egoera eta eredu kriminal hau geldiarazteko.
Ondorengo orduetan erantzun zabal eta anitza artikulatzen saiatuko gara, jendarte zein enpresa eremu ezberdinetan.