Aurreko azaroaren 9an ELA, Steilas eta CCOOk EAEko Gizarte Ekimeneko Ikastetxeetako akordioa sinatu zuten. Gaur, Ia hilabete bat pasa denean, mahai negoziatzailea izan dugu sinatutako akordioa lan hitzarmenean txertatzeko.
Aurreko azaroan LABek iragarri zuen bezala, delegatu eta afiliatuekin akordioa aztertu eta kontrastea egin eta gero, hainbat gabezia eta onartezin diren eduki detektatu genituen; besteak beste, enplegua mantentzeko akordioak ez du bermatzen birkokapena emango denik, eta, aldiz, kaleratzeen aukera aurreikusten du edo errelebu kontratua lortzeko beste eskubide historikoari (77.B artikuluari) uko egitea dakar berarekin.
Egoera hori ikusita, LAB sindikatuak gaurko mahai negoziatzailera kaleratzerik ez egoteko hainbat ekarpen eraman ditu akordioako zenbait puntu osatzeko, beste hainbat proposamenekin batera. Kristau Eskolaren esanetan, ez dute akordioa osatzea aurreikusten, beste behin ere negoziaziorako daukaten borondate eza agerian uztiz. Hala eta guztiz ere, LABek hurrengo bileretan akordioa osatzeko ekarpenak egiten jarraituko du, sinatu behar den hitzarmen berrian txertatzeko.
Horretaz gain, LABek agerian utzi du akordioa ez dela betetzen ari hainbat ikastetxetan, eta Kristau Eskolak azaroaren 9an sinatutako akordioa urtarrilaren 1 arte aplikatzeko asmorik ez duela adierazi du, sindikatu sinatzaileen pasibotasunaren aurrean.
Hori dela eta, eta akordioak oraindik langileen beharrei neurriko erantzunik ematen ez diela ikusita, LAB sindikatuak akordioa ez sinatzea erabaki du, eta, aldi berean, aukera paregabea galdu dugula adierazi nahi dugu akordio sendoago bat lortu eta benetako birkokapen planteamendu bat langileei eskaintzeko.
Orain arte bezala, LABek lanean eta borrokan jarraituko du sektore osoko baldintza duin, enpleguaren defentsan eta langile guztien eskubideen alde.