Irurtzungo Hydro Extrusion enpresan 8. greba eguna bete dute gaur. Grebaren nondik norakoak azaltzeko, Greba Batzorde eta Batzarrak egiten duten proposamena esplikatzeko eta aurrera begira planteatzen dituzten ekimenen berri emateko prentsaurrekoa degin dute. Gainera, arratsaldean, 17:30ean, manifestaziora dei egin dute Irurtzunen, enpresa dagoen tokitik herriko plazaraino.
Hauxe da Irurtzungo Hydro Extrusion enpresako Greba Batzorde eta Batzarrak eman duten prentsaurrekoaren edukia:
2010eko martxoan enpresak, biltegia azpikontratatzeko mehatxuarekin langileak bi taldetan banatzen zituen akordioa inposatu zuen. Alde batetik HYDRO soldata (garai horietan SAPA) duten langileak eta bestetik data horretatik aurrera kontratatuak izango ziren langileak, Nafarroako metalgintza hitzarmena aplikatzen zaienak.
Neurri honek epe muga bat zuen 2015ean. Urte horretan langile guztien soldatak parekatu behar ziren. Hilabete batzuk lehenago 2014ko ekainaren 6ean hauteskunde prozesua hasi baino bost egun lehenago, testuinguru hura erabiliz akordio bat lortu zuen orduko komitearekin soldata banaketa hori mugagabea izan zedin. Akordio hark etzuen erantzuten errealitateari, hauteskundeak ospatu zirenean sindikatu bat jokalekutik desagertu zen. Hau da, egun gutxitara enpresa komitean zegoen errealitatea eta posizioak kontutan hartuz, enpresak ez zuen gehiengo nahikorik akordio hura gauzatzeko. Osatu zen komite berrian ez zegoen adostasun nahikorik soldata arrakala betikotzeko. Akordio hura beraz fede txarrez eta gehiengo baten aurka eraiki zen.
Ez da gure asmoa sindikatuen posizioak azaltzea enpresan eman den eraldaketa guztiaren inguruan. 2010Ean, krisialdi orokor baten inguruan hainbat erabaki hartu ziren, baina gaur egun egoera asko aldatu da. 2014. urtetik ona, soldatak parekatu behar ziren urtetik enpresak 20.000.000€ inguruko irabaziak izan ditu. 2018Ko balantzean (dugun azkena) enpresak 5.260.000€ ko irabaziak izan ditu. Irabazi hauek guztiak langileon izerdi eta eskubide galerari esker izan da.
Gaur egun behin behinekoen eta ABLEen tasa handia dugu, 2010etik aurrera kontratatuak izan garenak %22 eta %25 gutxiago kobratzen dugu, 2012. urtean galdu genituen eskubideen kostua 3122€ koa izan zen urteko eta langile
bakoitzeko, Nafarroako metalgintza hitzarmenean baino hiru lanegun gehiago ditugu. Izan ditugun hobekuntzak eskubide galeren truke izan dira eta ez dira kontsolidableak, iraungitze data dute. Hori bai, soldata arrakala 2014ean betikotu zen.
Desberdintasuna jasangaitza da, hilabetean 1200€ra iristen ez diren lankideak ditugu, parekatuta egongo balira 500€ gehiago kobratuko lituzketenak.
Guzti horregatik, gainezka egin dugu eta gaurkoa 8. greba eguna dugu hurrengo egunetan jarraipena izango duena.
Gure aldarrikapenak egingarriak dira eta azken urteotan 2014tik aurrera enpresak pilatu dituen irabazien %1a da. Gogora ezazue 2014. urtetik aurrera lan baldintzak parekatuak egon behar zutela enpresan.
• Soldaten parekatze progresiboa. Abiapuntu bezala gaur egun %25ean kokatzen den soldata arrakala %12,5era jaistea.
• Azken urteetan sortu diren kontzeptu ez kontsolidagarriak, kontsolidagarri egitea.
• Kategoriak egiten ditugun funtzioen arabera errekonozitzea.
• Ez dadila egon jazarpenik greban aritu diren langileen aurka.
Egungo egoera ri irtenbide bat eman nahian LAB sindikatuak eta langile multzo handi batekin batera greba eta mobilizazioak egiten jarraituko dugu hurrrengo asteetan.
Azkenik dei egin nahi diegu UGT eta CCOO sindikatuei azkeneko akordioa sinatu ez dezaten eta borrokara batu daitezen. Elkarrekin indartsuagoak gara.