LAB, ELA, STEILAS, Etxalde eta Hiru sindikatuok Greba Orokorra deitu dugu martxoaren 17rako Hego Euskal Herrian, gutxieneko soldata propio eta duinaren defentsan, soldata hobeak aldarrikatuz. Deialdi horretarako, sindikatuok ahalegin militante handia egin genuen Gasteizen eta inguruan langileei grebaren testuinguruaz, arrazoiez eta helburuez informatzeko, hainbat euskarri informatibo, batzar eta bileren bitartez. Horren ondorioz, hamarnaka mila pertsonek baliatu zuten grebarako eskubidea, eta mobilizazio jendetsua egin zuten hirian, deialdiaren aldarrikapenekin bat eginez.
Bada, grebaren arrakastaren ondoren, Gasteizko Udalak Zigor Espedientea ireki zigun sindikatu deitzaileoi arau-hauste oso larri bat egitea leporatuta, herritarrei grebaren berri emateagatik kartel eta pankarten bidez. Hain zuzen ere, Udalak 1.500€ko isuna jarri digu, santzio erabat eskandalagarri bat.
Hau da, Gasteizko Udala eta euskal erakunde gehienak gobernatzen dituen PSE eta EAJren arteko koalizioak, Gasteizko Legebiltzarrean gure LGSa hemen erabaki ahal izateko 138.000 lagunek bermatutako LHE bat tramitatzea errefusatu zuenak, Grebaren aurretik eta ondoren gutxieneko soldata hemen negoziatzeari begira baldintzak sortzeko inplikatu ez denak, orain 1500€-ko isuna jarri digu, hain justu euskal LGSrako aldarrikatzen genuen kopurukoa.
Ez dugu uste kasualitatea denik isunaren ezarpena eta bere zenbatekoa, baizik eta euskal langileriarentzat eta Gasteizko langileentzat sinbolismo argia duen kopurua eredugarri bihurtzeko interesari erantzuten dio.
Udalak langileen aurkako jarrera antisindikala erakusten du horrela, beste sektore batzuetako gatazketan, Esku Hartze Sozialean adibidez, isunak ezarriz erakutsi duen bezala. Isunen bidez lan aldarrikapenak isilarazi nahi dituzte, greba eskubideari eraso nahi diote eta etorkizuneko mobilizazioak baldintzatu nahi dituzte.
Honen aurrean, LAB, ELA, STEILAS, Etxalde eta Hiru sindikatuok Udalari eta berau gobernatzen duten EAJ eta PSE alderdiei dei egiten diegu:
– Mobilizatzeko helburuz antolatzea erabakitzen duten langileen aurkako jarrera hau bertan behera uztera
– Eta 1500€ko gutxieneko soldataren aldarrikapena errealitate izan dadin inplikatzera.
Gure aldetik, langileria antolatzen jarraituko dugu, informatzen eta aktibatzen, bere lan baldintzak hobetzeko.