Hego Euskal Herriko hiriburuetako kaleak hartu ditugu, pentsiodunen mugimenduak deitutako mobilizazioak direla eta. Euskal Herriko Eskubide Sozialen Karta osatzen dugun gehiengo sindikal eta eragileok bat egin dugu manifestazioekin, urtarrileko Greba Orokorra mugarri izango duen dinamika mobilizatzailearen baitan. LABeko idazkari nagusi Garbiñe Aranburuk eta idazkari nagusi ondoko Igor Arroyok hitza hartu dute Bilbon eta Iruñean, hurrenez hurren. Hain justu, Euskal Herriko Eskubide Sozialen Kartak osatutako zutabea Bilboko Moyua plazara iritsi denean egin ditu adierazpenak Garbiñe Aranburuk. "Iritsi da ordua pentsioen aldeko borroka langile klase osora zabaltzeko", adierazi du, eta gaur egungo lan baldintza duinak etorkizuneko pentsio duinen bermea direla nabarmendu du.
LABeko idazkari nagusi Garbiñe Aranburuk manifestazioan bertan azaldutakoaren arabera, "pentsio publiko duin batzuen alde mobilizatzen ari gara. Eskatzen duguna da 2011 eta 2013ko pentsio erreformak atzera botatzea, baita 1.080 euroko gutxieneko pentsio bat ere. Pentsioaren aurreikuspena KPIari lotuta izatea da egiten dugun beste aldarrikapenetako bat, baita pentsio sistema propio bat ere. Gaurko protesta dinamika mobilizatzaile orokorrago baten baitan kokatzen dugu, eta dinamika mobilizatzaile horretako inflexio puntu garrantzitsuena urtarrilean egingo dugun Greba Orokorra izango da, enplegu, pentsio eta bizitza duinaren alde".
Sindikatuko idazkari nagusiaren hitzetan, "iritsi da ordua pentsioen aldeko borroka langile klase osora zabaltzeko. Langileria osoari dagokigun borroka da pentsioen aldekoa. Guk egin dezakegun ekarpena bada, baita ere, lan prekarietatearen aurka borrokatzea; batez ere, soldata prekarioen kontra. Horregatik, 1.200 euroko gutxieneko soldata eskatzeaz gain, pentsio eta soldata arrakalekin amaitzea eskatzen dugu, gaur egungo lan baldintza duinak direlako etorkizuneko pentsio duinen bermerik egokienak".
Greba Orokorrari begira
Hego Euskal Herriko pentsiodunen mugimenduak bi urte daramatza pentsio duinen alde astero mobilizatzen eta, hasieratik, LABek bat egin du mobilizazioekin eta aldarrikapenekin. Argi eta garbi dugu, pentsioen kontrako etengabeko erasoaldiaren atzean, kapital finantzieroa dagoela, eta gure pentsioen kontura negozio berri bat egin nahi duela. Gainera, erasoaldia ez da soilik pentsioetan ematen, gure bizitzaren esparru guztietan kokatzen da, hala nola, enpleguan, eskubide sozialetan, zaintzan, edo eta sektore publikoan.
Pentsiodunek irekitako bide horretan, LAB sindikatuak dagokion lekua hartu eta mobilizazioetan presente dago, bide hori babestu duten gainerako eragileekin batera. Krisiaren aitzakian azken hamarkadetan azkartu den lan eta bizi baldintzen prekarizazio prozesuari muga jarri eta lan baldintza, pentsio eta bizitza duinak bermatuko dituzten neurrien aldeko mobilizazio dinamikan parte hartzen ari gara. Hala, gaurko mobilizazioan ez ezik, abenduan aurrekontuen eztabaida tarteko egingo direnetan ere izango gara, urtarrilerako deitutako Greba Orokorra mugarri izango duen dinamika mobilizatzailearen baitan. Era berean, joan den urrian, Diru-sarrerak Bermatzeko Errenta murrizteko proiektua atzera botatzeko exijitu genuen Gasteizko Legebiltzarraren aurrean, Euskal Herriko Eskubide Sozialen Kartaren eta aipatutako dinamika mobilizatzaile horren baitan ere.
Bestelako eredu bat eraiki nahi dugu, bizitza erdigunean jarri eta zaintza eta lurraren jasangarritasunari lehentasuna emango diona. Eta erabaki nahi dugu, lan, pentsio eta bizi duina bermatzeko. Gaur, pentsiodunen mobilizazioetan, pentsio sistema publiko bateb alde egin dugu, baita 1.080 euroko gutxieneko soldata aldarrikatu ere.