Ehundaka pertsonak manifestazioa egin zuten atzo arratsaldean Iruñean, udaletxe-plazatik abiatuta, “Borroka sindikala aurrera” lemarekin. Askatasun eta borroka sindikalaren aldeko mobilizazioa izan zen atzokoa, eta errepresioaren kontrakoa. Izan ere, hiru prozesu penal daude irekita Huerta de Peralta eta La Sangiovesan zegoen prekarietate eta esplotazioa salatzeko antolatutako protestean parte hartzeagatik. Lehenean, fiskaltzak 2.880 eurotako isuna eskatu du sindikatuko kide batentzat. Bigarrenean, urtebeteko kartzela zigorra LABeko kide batentzat. Eta hirugarren kasuan Huerta de Peraltako langile baten aurkako eskariak egin ditu: 2 urte eta 6 hilabeteko kartzela, 2.500 eurotako isuna eta Estatu espainoletatik 5 urtez kaleratzea.
Igor Arroyo LABeko idazkari nagusi ondokoak, “justiziaren patronalizazioaren kontrako” mobilizaziotzat jo zuen atzokoa, “prekarietatearen kontrako mobilizazio sindikal zilegiak erreprimitzeko Foruzaingoaren erabilera maltzurraren kontrakoa”. Gainera, adierazi zuen mobilizatzen jarraituko dutela, 20.000 eurotako isunak eta Jotas, Imanol eta Abdenabi bezalako LABeko kideen aurkako prozesu penal guztien gainetik lehentasuna emango diotela prekarietatearen kontrako borrokari. “Langile klasearentzat tresna eraginkorra izaten jarraituko dugu sektore prekarizatuenentzat, prekarietatearen aurkako borroka horretan”.
Justizia-sistemari kritika eginez amaitu zuen Arroyok bere hitzartzea: “Elkartasunezko ekintza sindikala aktibatzen denean, borroka sindikala aktibatzen denean, borroka sindikala patronala eta eskrupulorik gabeko enpresariei irabazten ari denean, orduan Foruzaingoa azkar asko joaten da enpresa atarira patronalaren piketea montatzera. Orduan bai, fiskalek neurriak hartzen dituzte. Orduan bai, orduan ematen du justizia horrek begi eta belarriak dituela”.