Huerta de Peraltako grebako protestetan parte hartzeagatik sindikalisten aurkako hiru prozesu penal daude irekita, Foruzaingoaren salaketek eta Fiskaltzaren zigor eskaerek eraginda. Bihar, uztailaren 2an, lehen prozesuaren epaiketa eginen dute Iruñean Jose Javier Oses LABeko kidearen kontra, eta honek erabaki du epaiketara ez agertzea, uste baitu “prekaritatearen erregimena” izan beharko litzatekeela epaitu beharrekoa. Arratsaldean, manifestazioa izanen da Iruñean, askatasun sindikalen alde eta sindikalisten aurkako jazarpen polizial eta judizialaren kontra.
uerta de Peralta enpresan zegoen prekaritatea eta esplotazioa salatzeko eta greba eskubidearen kontrako urraketak salatzeko protestetan parte hartzeagatik hiru prozesu penal daude irekita. Batean 2.880 euroko isuna eskatu du Fiskaltzak LABeko kide baten kontra. Bigarrenean, urtebeteko kartzela zigor bana eskatu du LABeko bi kideren kontra. Eta hirugarrrenean Huerta de Peraltako langile baten aurka egin du modu krudelean: 2 urte eta 6 hilabeteko kartzela zigorra, 2.500 euroko isuna eta eta 5 urteko kanporatzea.
Uztailaren 2an eginen dute lehen prozesuari dagokion epaiketa, Jose Javier Oses LABeko kidearen aurkakoa. 2.880 euroko isuna ezarri nahi diote “desobedientzia” delitu bat leporatuta. Osesek erabaki du biharko epaiketara ez agertzea. “Haiek desobedientzia leporatu digute, eta guk desobediente izaten jarraituko dugu”, adierazi du. “Juztizia patronalaren aurrean planto eginen dut eta ez naiz epaiketara agertuko, prekaritatearen erregimena izan beharko bailitzateke epaitu beharrekoa”.
Osesen hitzetan, sindikalistak epaitzen ari diren bitartean, ehunka enpresaburu ari dira lan araudia urratzen, batere zigorrik jaso gabe. “Eta haien zerbitzura dituzte, gainera, ustelkeria politikoa eta bortizkeria poliziala. Izan ere, non daude poliziak, Fiskaltza eta Lan Ikuskaritza hitzarmenak behin eta berriz urratzen dituztelarik? Non daude langileak hiltzen direlarik segurtasun arauak ez betetzeagatik? Argi dago non dauden, gu egurtzen, gu izutu nahian, beldurra eta sumisioa zabaltzen, Nafarroan ezarri duten prekaritatearen erregimena are gehiago finkatzeko”.
Jazarpen polizial eta judizial horri guztiari aurre egiteko LAB sindikatuak Borroka sindikala aurrera kanpaina jarria du martxan. Kanpaina horri lotuta, hainbat mobilizazio egin dira eta eginen dira. Bihar berean manifestazioa izanen da Iruñean, 19:00etan Udaletxe plazatik abiatuta.
LABek langileei dei egiten die mobilizazioetan parte har dezaten klase sindikalismoaren alde eta patronalak inposaturiko prekarizazio prozesuaren aurka.