10 eguneko epean, Leitzako ZUBILAGA SARALEGI S.L. enpresako bi langilek lan istripu larriak pairatu dituzte Sakanako Iturmendi herriko basoan. Urriaren 22an, 34 urteko langile bat helikopteroan atera behar izan zuten altueretako erori baten ondoren. Atzo, Iturmendiko baso eremu berean, 62 urteko E.A.D langilea adar batek jota hil zen basogintza lanetan ari zela.
Basogintza sektorea hilkortasun tasa handiena duen sektore bezala identifikatua du LABek. Hain zuzen, eraikuntzak berak baino 10 aldiz hilkortasun handiagoa eragiten du urtez urte. Bi hildako eragin ditu dagoeneko 2025ean, hiru 2024ean, eta larriki zaurituriko zerrenda luzea dago urtero. “Kontuan izanik sektorea ez dela 1000 langilera iristen Euskal Herria osoan, datuak beldurgarriak dira”.
LAB sindikatuak adierazi du istripu tasa honen atzean prebentzio neurrien ez betetze orokortua dagoela. “Basogintza patronalak ez du inongo osasun bermerik eskaintzen. Sektoreak langile prekarizatuenak erabiltzen ditu bere mozkinak bermatzeko, ez du tresneria egokia erabiltzen, eta formakuntza eskasa ematen die langileei”. Bada, sindikatuaren arabera, beste gako gehigarri bat istripu tasa honen atzean, lanaldiko ordu kopuru izugarria. “Ohikoa da goizaldetik iluntzerarte langileak basoan topatzea, honek urte-garaiaren arabera 12 ordutako jardunaldia suposatzen du”. Nekea beraz, arrisku faktore oso nabarmena da bereziki sektore honetan, istripuak eragiteko arrazoi garrantzitsua.
Nafarroan basogintza lanak batez ere eremu publikoetan garatzen dira eta hortaz, “administrazioak baditu tresnak patronalaren araudi hausteak mugatzeko”, salatu du LABek . “Hain zuzen esleipen pleguak erabili daitezke araudiaren ez betetzea isuntzeko, lanorduak kontraktualki mugatzeko eta beste hainbat baldintza ipintzeko, halanola Errekurtso prebentiboaren presentzia baso-lan guztietan behartzeko”.
Egoera hau salatzeko, lan osasunerako intersindikala osatzen duten LAB, ESK, STEILAS, EHNE-etxalde, HIRU ETA CGT-LKN sindikatuek ekimen berezia antolatu dute azaroaren 10ean Gaztelu Plazan.