LAB sindikatuak idatziz eskatu dio Osakidetzari enpresa israeldarrei erositako produktuak ordezkatzeko alternatibak aztertzeko eta estatu sionistako enpresa garrantzitsuenaren, Teva Farmaceutics-en, botikak banatzeari, erosteari edo preskribatzeari uzteko exijitu dio.
Osakidetzak Tevari erosten dizkion botiken gehiengo zabalak merkatuan alternatibak ditu, asko generikoak eta Europan jatorria dutenak.
Euskal osasun-zerbitzu publikoak ez du kolaboratu behar Palestinako lurraldeen okupazio israeldarra ahalbidetzen duen genozidioaren ekonomiarekin. Horretarako, era guztietako harremanak berrikusi behar dira, bereziki merkataritza-harremanak, harreman horiek finantzatzen baitituzte Palestinako okupazioa eta bere herriaren genozidioa.
Langileek eta erabiltzaileek kontziente izan behar dugu Teva farmazia-etxeko botika bat preskribatzen edo kontsumitzen dugunean genozidioa finantzatzen ari garela.
Osakidetzak 7 milioi eurotik gorako balioa duten botikak erosi dizkio farmazia-etxe honi 2023tik 2025eko urtea barne. Hau gelditu behar da, eta ez dugu onartu behar diru publikoa Israelgoa bezalako estatu genozida baten eskuetan amaitzea.
Nafarroako Osasunbidea dagoeneko hasi da Osakidetzarako eskatzen ditugun neurri horiek hartzen, beraz, posiblea eta beharrezkoa da.
Horregatik, gaur idatzizko eskaera baten bidez eta hilaren 31n Osakidetzako mahai sektorialean presentzialki eskatuko dugu Osakidetza Palestinako genozidioaren finantzatzaileetatik kanpo mantentzea bilatzen duten neurriak hartzea, LABentzat oso larria den gaia.
Era berean, ekimenak aurkeztuko ditugu ESI-etako plantillaren ordezkaritza-organo guztietan, Palestinako genozidioak Osakidetzan kolaboratzailerik izan ez dezan.