Haurreskoletako doakotasuna hizpide dute gaur, besteak beste, Eusko Legebiltzarreko Hezkuntza Batzordean. Hori probestuz, eta sinatu genuen akordioa betetzeko azkenaldian izaten ari garen zailtasunak salatzeko, elkarretaratze bat egin dugu Legebiltzarraren aurrean.
2019ko urtarrilaren 1etik aurrera Haurreskolak Partzuergoa doakoa izango da 18.000 euro baino gutxiagoko errenta duten familientzako. Urrats hau LABentzat ere garrantzitsua da, haurrei jaiotzatik aukera berdintasunean hezkuntzarako eskubidea aitortzen zaielako.
LAB sindikatuak neurri hau ondo baloratzeaz gain, gogorazi nahi dio Eusko Jaurlaritzari, neurri hau Haurreskolak Partzuergoko doakotasuna lortzeko lehenengo urrats gisa planteatu zela Legebiltzarretik. Ziklo honetan dagoen eta egon daiteken segregaziorako joera desberdinak baztertzeko aukera paregabea dela uste du LABek, xedea argi izanik hurrengo pausuetan pentsatzen hasi behar direla argi dugu.
Hezkuntza saileko Haur hezkuntzako lehenengo zikloa den, Haurreskolak Partzuergoa, doakoa, unibertsala, euskalduna, kalitatekoa, eraldatzailea, feminista… izan dadin, hezkuntza sistema propioaren alde eta Euskal Eskola publiko komunitarioa iruten jarraituko dugu.
Halaber, martxoan akordioan sinatu genituen puntu guztiak bete eta garatzea eskatzen dugu, kudeaketako langileen lanpostuen zerrenda handitu, oposaketa fasea zehaztu… Ordezkapen guztiak beteko zirela adostu bazen ere, hauek baldintzatzen jarraitzen dute. Lan hitzarmena negoziatzeko abiapuntua delako, akordioa bere osotasunean bete eta garatzea exijitzen dugu.