Aurreko astean egindako batzarrean adostutakoari helduta, Garbialdiko langileek mobilizazioak areagotzea erabaki dute. Hala, negoziazioa desblokeatzeko gai ez badira, grebara berriro irtengo direla jakinarazi dute. Eta greba hori, maiatzean burututakoa baino gogorragoa izango dela ohartarazten dute. Bitartean, beste elkarretaratze bat egin dute Bizkiako Foru Aldundiaren aurrean.
Aurreko astean egindako asanblada jendetsu batean, sektorean gehiengoa diren langile eta sindikatuek protestak gogortzea erabaki dute. Hilabeteko epea eman diote patronalari gatazkari irtenbidea emateko. Epe horretan aurrerapenik ez egotekotan, badakite greba izango dela haien helburuak lortzeko tresnarik eraginkorrena.
Urriaren 2an, negoziazio mahaia izan zuten enpresarekin. Azkenengo mahaia maiatzean izan zen, egindako sei greba egun eta honi jarraitu dioten hamaika mobilizazioen aurretik; ondorioz, enpresaren proposamena desberdina izango zelakoan zeuden.
Ez zen horrela izan. Garbialdik 2017ko ekaineko eskaintza hura errepikatzera mugatu zen: %0,3ko igoera 2017rako eta %0koa gainontzeko urte guztietarako.
Urteak igaro dira aldarrikapen argi batekin borroka hau piztu zutenetik: Udalhitzeko 6. nibelera ekiparatzearena, alegia, horrek suposatuko lukeen %6,54ko soldata igoerarekin. Administrazioko soldatetara ekiparatzea, administrazioaren egiturazko parte direlako.
Pasa den abenduaren 5etik astero mobilizatzen ari dira. 50 protesta baino gehiago aurrera eraman dituzte ordutik. Igarotako hilabete guzti hauek, ahuldu beharrean, haien burua antolatzeko eta ahalduntzeko erabili dituzte. Puntu honetara helduta, aurrera egitearen aldeko apustua egin dute.
Garbialdin, sektore feminizatuetako gainontzeko enpresetan bezala, prekarietatea da nagusi. Hor dago arazoaren muina.