Bihar, Legebiltzarrean Darpon EPEaren eskandalua ezkutatzen ahalegintzen den bitartean, LABek kontzentrazioa egingo du aurrean, goizeko 9.30ean, berdintasuna, meritua eta kapazitatean oinarrituriko filtraziorik gabeko EPEa eskatzeko eta Oviedoko ikerketaren gaineko balorazioaren inguruko adierazpenak egiteko.
Análisis del informe psicométrico encargado por Osakidetza a la Universidad de Oviedo sobre la OPE
EPE honetako emaitzak ikertzeko Osakidetzak Oviedoko Unibertsitateari eskatu zion txostenak ez ditu zalantzan jartzen LABek egindako ikerketa estatistikoak, ezta salaturiko irregulartasunak ere. Ikerketa honi buruz LABek egin duen azterketaren harira, filtrazioez zuzenean ez hitz egin arren ikerketan, egilearen hitzetan hori ez zelako helburua, argi gelditzen da behin eta berriro salatuak izan diren hainbat kategoriatan normalak ez diren emaitzak bai agertzen direla.
Adibide moduan, esan dezakegu 36 azterketetan (30 kategoriari dagozkionak), puntuazioen banaketaren indizea ez dela zifra normaletara heltzen. Bestaldetik, 17 kategoriatan izangaien zentroen araberako banaketa ez da normala. Azkenik, 20 kategoriatan ez dago korrelazio egokirik lehenengo eta bigarren azterketen emaitzen artean.
Datu hauek guztiek gure salaketak indartu baino ez dituzte egiten. Horregatik, Osakidetzak ez duela ikerketa bururaino eraman nahi salatzen jarraitu behar dugu; gure aburuz, eskandalua ahalik eta lasterren eta ahalik eta ondorio txikienekin estali nahi dutelako.
Hau dela eta, Osakidetza eta Osasun Sailaren gardentasun eza salatu nahi dugu eta baita exijitu ere ikerketa bururaino eraman dezatela, argitu ahal izateko non egin ziren filtrazioak, nork egin zituen eta nor atera zen onuradun. Bestaldetik, martxan ipini behar den EPE sistema berria adosteko negoziazioa irekitzea funtsezkoa jotzen dugu.