2024an, aurreko urtean baino 5 lanpostu gehiago galdu dira.
Sindikatu honek 2023an jendaurrean nahiz Ikuskaritzan aurkeztu zuen enpresaren aurkako salaketa, langileek egiten zituzten aparteko orduen kopurua gehiegizkoa zela nabarmenduz. Ordutik enpresak hartu duen jarrerak argi uzten du ikusiarena egiten jarraitzen duela langileen egoera prekarizatzen duen arazo honen aurrean.
2024an 29.488,79 aparteko ordu egin ziren, aurreko urtean baino % 41,17 gehiago, eta 144 langilek gainditu zuten legeak ezartzen duen muga (gehienez 80 aparteko ordu lan egitearena). Ordu osagarriei dagokienez, hau da, kasuan kasuko lan kontratuan itundutakoez gaineko orduei dagokienez, 4.442,59 ordu osagarri egin ziren, 2023an baino % 82,70 gehiago. Egoera horrek langileen ezegonkortasuna areagotu egin zuen, eta plantillaren kontziliaziorako eskubidea zaildu.
Aparteko orduak eta ordu osagarriak baturik, 2024. urtean 33.929,38 ordu egin ziren. Izugarrizko kopurua da hori, lanaldi osoko 21 lanpostu kentzeko adina.
Kontuan harturik gure erkidegoan 22.500 langabe zeudela 2024. urtearen bukaeran, lotsagarria iruditzen zaigu TCCk familia askoren egonkortasunarekin eta mantenuarekin jolasean aritzea.
Ez dezagun ahaztu IruƱerriko Mankomunitateak ere erantzukizun handia duela gai honetan, TCCk bezainbeste. Hori dela eta, afera honetan eskua sartu beharko luke eta guztiz galarazi bai halako praktikak, bai langileen baldintzak okerragotzen dituzten beste hainbat ere.
Aparteko orduak egiteko sistemak urritasuna, langabezia eta langileen arteko elkartasun eza dakartza berekin. Oso argi daukagu arazo hau lehenbailehen konpondu beharra dagoela.
LABek beti egin du lana sustatzearen eta aberastasuna banatzearen alde, hizarmenen negoziazio guztietan.
Horregatik, aparteko orduak egiteko filosofiaren eta ondorioen aurrean, ezinbestekoa da enplegu osoa eta lan baldintza duinak defendatzea, baita langabezia-tasak murriztea ere berdintasunean eta lanaren banaketan oinarrituriko mekanismoen bidez.