Poztekoa da hizkuntza eskakizunak baliogabetzeko UGTren asmoek aurrera egin ez izana eta LABen arlo juridikotik eginiko lanari esker euskararen aldeko epaia erdietsi izana.
Izan ere, enplegua egonkortzeko prozesuaren baitan UGT sindikatuak euskarazko hizkuntza eskakizuna inpugnatu zuen, hainbat urtetan euskararen normalizazioa bultzatzeko eginiko aurrerapenak deuseztatu nahi dituen oldarraldi judizialaren olatura igota, CCOO bezalako sindikatuak egiten dabiltzan moduan.
Bada, LABen hasieratik adierazi genuen Euskotrenen euskaraz lan egin nahi duten langileen eta euskaraz artatuak izan nahi duten erabiltzaileen hikuntza-eskubideak urratzeko ateak parez pare zabalduko liratekeela eskakizunok baliogabetuz gero. Horrenbestez, oraingo epaia pozez hartu dugu; ordea, ez dugu uste ezerren amaiera denik, eta ezinbestekoa da azkenaldian ateratzen ari diren hizkuntza-eskakizunen aurkako epaiek urratu nahi duten bideari galga jartzea eta, hortik harago, normalizaziora bideratutako neurri eta ekimenak areagotzea.
Euskotreneko kasu honetan, esan bezala, epaiak ezarri du hizkuntza eskakizunak bere horretan mantenduko direla; izan ere, Euskotreneko hitzarmen kolektiboak (UGTk berak ere sinatu zuenak) jasotzen ditu eskakizunok, eta Euskara Planari jarraikiz ezarri dira. Dena den, LABen uste dugu hizkuntza-eskakizunen zilegitasuna ez dela horretara mugatzen. Aldiz, oinarrian izan behar duena euskararen normalizaziora bideratutako helburu komuna da, eta euskal hiztunon eskubideak errespetatzearen bermea.
Gauzak horrela, justizia sozialean eta berdintasunean oinarritutako hizkuntza-politikak aldarrikatzen jarraitzeko asmoa daukagu LABen, politika horiek izan direlako euskararen alde borrokan ibilbide luzea egin duen euskal komunitate sendo eta indartsu bat izatea ekarri dutenak.