LAB sindikatuaren komunitateko hogei langile inguruk Iruñeko Oliveto kondearen kalea moztu dute gaur goizean, bi noranzkoetan, Nafarroako zahar egoitzetako lehenbiziko hitzarmena izanen denaren negoziazioak blokeaturik jarraitzen duelako protesta egiteko. LABek zahar etxeetako langilen jarrera irmoa eta konpromisoa txalotu nahi ditu, baina Foruzaingoaren jokabidea salatu, gaurkoan modu txarrean atera baititu protestariak errepidetik. LABek bi orduko lanuztea deitua zuen gaurko; apirilaren 17an bertze lanuzte bat egitera deitua du; eta negoziazioak desblokeatu ezean, apirilaren 24an egun osoko greba egitera deituko du.
Iazko azaroan egin bezala, LABek Iruñeko kale bat moztu du gaur, orduan bezala egun ere Nafarroako zahar egoitzetako hitzarmenaren negoziazioa blokeaturik dagoelako. Hain zuzen ere, gaurko, bi orduko lanuztea egitera deitua zuen sindikatuak, azken hilabeteetan deitu duen laugarren lanuztea. LABek aspaldi erabaki baitzuen kalera ateratzea, zahar egoitzetako langileen lan baldintzak nabarmen hobetuko lituzkeen hitzarmenaren blokeoa salatzeko, eta kezkaz ikusten ari da nolako utzikeria eta arduragabekeria erakusten ari diren LARES eta ANEA patronalak eta Nafarroako Gobernua.
Iazko azaroko kale mozketan ez bezala, gaurkoan polizien jokabidea salatu beharrean dago LAB, modu txarrean atera baitituzte langileak errepidetik. Jendea besotik gogor hartu dute eta kanporantz bulkatu, eta hiru lagun identifikatu dituzte. Nafarroako Gobernuaren poliziak emakume* langile hauen kontra jo du gaur, Nafarroan zaintza lanekin dagoen negozioa eta langileen prekaritate eta egoera jasangaitza estaltzen aritzen den Gobernuaren poliziak. LABek bere elkartasuna eta babesa adierazi nahi dizkie identifikaturiko eta erasoturiko langileei, eta adierazi nahi du langileen kontrako mespretxu hau langileen eskubideen defentsarako indar bilakatuko duela.
Hitzarmenaren alde hiru urte baino gehiago borrokan
LABek 2023ko ekainean borroka ziklo berri bat ireki zuen Nafarroako zahar egoitzen lehen hitzarmen kolektiboa desblokeatzeko eta Nafarroako Gobernuaren eta patronalen utzikeria salatzeko. Ziklo horren barruan LABek gaurkoa bezalako hainbat ekimen egin izan ditu. Apirilaren 17rako, 10:00etatik 12:00etara gelditzera deitu du, eta azken hilabeteetako borzgarren lanuztea izanen da.
Nafarroako zahar egoitzetako lehen hitzarmenaren aldeko borroka LABek bultzatu zuen 2021eko urtarrilean, estatalizazioari aurre egiteko eta milaka langileren lan eta bizi baldintzak hobetzeko eta duintzeko helburuarekin. Harrezkero, LABek ez du patronalarengan negoziatzeko borondate irmorik ikusi, eta Nafarroako Gobernuak entzungor egin die langileen aldarrikapenei.
LABek patronalei negoziazio mahaia deitzeko eta langileen aldarrikapenak bilduko dituen negoziazio proposamena aurkezteko eskatzen die. Eta Nafarroako Gobernuari eskatzen dio erantzukizunez joka dezala, eta bere gain har ditzala gizartearen oinarrizko premia bati eusten ari diren milaka nafar langile horien zaintza-lanen balioa aintzatestea. Beraz, Gobernuaren betebeharra da sektorean bizi den prekaritatea ezabatzea.
LAB sindikatuak hasitako borroka ziklo honek, eta egindako lan sindikal eta politikoak, bertze sindikatu batzuk kalera ateratzea eragin du. LAB pozik da horrekin. Ongi dago bertze sindikatu batzuk borrokan sartzea, argi baitago borrokarik gabe ez dela hitzarmenik izanen. Kalean zein lantokietan indarra erakusteak LARES eta ANEA behartuko ditu negoziazio proposamen berri bat aurkeztera.
