Gaur Sabin Etxean, EAJren egoitzaren aurrean, bildu dira Mecanerreko langileak. Azken urteetan Eusko Jaurlaritzaren buru izan den alderdiari Euskal Herriko industria defendatzeko neurriak har ditzan eta trantsizio sozialki justua eta jasangarria ahalbideratu dezan neurriak hartzeko exijitu nahi izan diote hala.
Urdulizen kokatutako automobilginatza enpresa horrek 60 urte baino gehiagoko historia dauka
Bada, jakina denez, 2023ko irailean Mecanerren jabe den Stellantisek enpresa ixteko erabakia hartu zuela jakinarazi zien beharginei.
Mecanerren gertatzen ari dena ez da egoera isolatua; izan ere, azken urteotan Euskal Herriko industria-ehuna desagertzen joan da, gure inguruko enpresa asko eta asko itxi dituztelarik eta haien tokiak zerbitzuetako enpresa handi eta kateek hartu dituztelarik. Industriaren desagerpena ahalbideratu dute instituzio eta alderdi ezberdinek, eta erantzuleek izen-abizenak dituzte.
Gelditzen den industria, gainera, ez da hemengoa, multinazional handiak sartu baitira gure industrialdeetan. Izen eta letreroak mantenduta ere, orain hemengo industria multinazional handien esku dago. Are gehiago automobilgintzaz ari bagara.
Bertako industriaren galerak, beste herrialde batzuekiko dependentziak eta multinazionalen sarbideak industria-burujabetzaren galera ekarri dute. Zer, zelan eta zertarako ekoitzi nahi dugun ez dugu hemengo herritarrek erabakitzen, ezta bertoko instituzioek ere.
Lurraldearekin eta hemengo jendearekin loturarik ez duten enpresak, Stellantis, kasurako, etorri diren bezala badoaz. Hemen ekoizten dutena beste leku batean merkeago ekoitzi ahal badute, behintzat.
Industriaren desegiteak, gainera, enpleguaren suntsipenera eta prekaritatera kondenatzen gaitu hemen lan egin eta bizi garen herritarrak.
Hala, ehun industrialaren suntsiketa eta lanpostuen desagerpenaren erantzukizuna eta ardura
politikoa beraiena dela adierazi nahi izan diete Mecanerreko langileek Sabin Etxekoei.
Azken egun hauetan, hauteskunde politikoen kanpainan ahoa bete zaie industriaz eta etorkizunaz hitz egiten. Bada, promesa elektoral horietatik kanpo ausardiaz pausuak emateko unea da.
Horregatik, Mecanerreko langileek ondorengoa exijitu diete Euskal Herriko industriaren galeraren erantzuleei:
- Euskal Herriko industriaren eta enpleguaren etorkizuna bermatuko duten industria-politikak.
- Industriaren eta automobilgintzaren trantsizio sozialki justua eta jasangarria aurrera eramateko neurriak hartzea, eta hori posible egiteko trantsizio batzordeak sortzea.
Mecanerri dagokionez, euren etorkizuna oraindik ez dago erabakita, baina Mecanerrentzako etorkizun industriala posible dela frogatu dute langileek egin duten trantsizio planarekin. Baina egindako bidean jarraitu eta enpresaren itxiera saihesteko borondate politikoa behar da, eta hori exijitu nahi dute:
- Stellantisekin eta langileekin batera Mecanerren etorkizunaz hitz egiteko negoziazio-mahai bat eratzea.
- Eskura dauden baliabide eta tresna guztiak erabiltzea Mecanerrentzako etorkizun bat bilatzeko.
- Finean, paper aktibo eta erabakigarria hartzea 144 lanpostuen eta Mecanerreko etorkizunaren defentsan.
“Aukerak daude eta garaiz gaude, ardura zuena da”, adierazi dute enpresa-batzordeko ordezkariek.
