Kimiketako sektorean Hego Euskal Herri osoan gertatzen den estatalizazio eta prekarizazio egoerarekin amaitzeko unea da.
LABetik beti defendatu ditugu euskal eremuetan erabakitzeko markoak, modu kolektiboan hemengo errealitateari hobekiago erantzun ahal izateko eta Euskal Herrian dagoen errealitate sindikalak lan baldintza hobeagoak lortzeko aukera ematen dituelako.
Kimiketako Hitzarmenean dauden langileak, Hego Euskal Herrian 20.000 inguru, Espainar Estatu mailako hitzarmenaren pean daude, eta horrek prekarietate handiagoa dakar berekin. Hitzarmen hau bereziki nahasgarria da, eta beste eremu batzuetan baldintzak erregulatzea zailtzen du.
Hemengo hitzarmen bat egotearen beharra garbia da, eta zailtasunak zailtasun, LAB hitzarmen hori lortzeko borroka azken muturreraino eramateko prest dago. Bide horretan pausuak ematen hasi gara dagoeneko, Madrilgo negoziazio mahaiari asmo hori adierazita, EAE-n ordezkaritza gehien duten sindikatuen artean bilduz eta sektoreko patronalak irailaren 26an egingo den bilera batera deituz. Nafarroan, berriz, gaur sindikatuen arteko lehendabiziko bilera egingo da.
Oraingoa momentu erabakigarria da borroka honetan, estatuko hitzarmena urte bukaeran indargabetzen delako. Aurkezten zaigun aukera eta indar sindikal desberdinen konpromisoa ezinbesteko baldintzak dira borroka honetan, baina are ezinbestekoagoak dira langileon inplikazioa eta aktibazioa. Horregatik, dei egiten diegu Hego Euskal Herriko Kimiketako sektoreko langileei borroka honetara batzeko, ibilbide honetan denok batera aritzeko, asko dugulako irabazteko eta sektoreko langilerik gabe ezinezkoa izango delako.