Eskaintza hau Nafar Lansarek arauturikoa da eta interes orokorra duten obra eta zerbitzuak gauzatzearren zailtasun handiak dituzten langabetuen kontratazioa bultzatzea du xede, Europar Funtsa Sozialak kofinantziaturik. Alkate Andreak, berriz, edukia murriztu eta ebazpenean agertzen diren bestelako kolektiboak baztertzea erabaki du. Hala nola, %33tik gorako desgaitasuna dutenak, indarkeria matxistaren biktimak, emakumeak orokorrean, eta 30urtetik beherako gizonezko gazteak.
Ebazpen hori bete beharrekoa da eta alkateak, ezta edozein administrazioak ere, ezin die aipatu betekizunak betetzen dituztenei sarbidea galarazi, aldez aurretiko aukeraketa nahieran eginez eta lehiakortasun librea mugatuz. Halaber, ezin du ebazpenak jasotzen ez duen legez kanpoko betekizunik asmatu, Corteseko bizilagun izatearena kasu.
Begi bistakoa da eskaintza hau Konstituzioaren aurkakoa dela. Are larriagoa da agintari publiko batek entitate publiko baten izenean enplegu publikoa eskainiz matxismo islapen hau izenpetzea. Herritar guztion eskubideen bermatzaile izan beharko lukeenak horrelako praktikak betikotzea guztiz onartezina da. Feminismoak pertsona guztiondako harremanetan eta bizitza arlo guztietan eskubide eta aukera berdintasuna aldarrikatzen duen eraldaketa sozialaren kontrakoak baitira.
LAB sindikatutik eskaintza hau bertan behera utzi eta aukera berdintasuna bermatuko duen bat onartzea errekeritzen dugu.