Gaur, hilak 28, Bizkaiko delegatuok batzarra egin dugu Bilbon Euskal Herriak bizi duen egoeraren gako nagusiak konpartitzeko. Ostean, hainbat sektore eta lan zentrotako delegatuok, Bizkaiko Foru Aldundiaren aurrean mobilizatu gara “Prekarietateari STOP! Aldundia eta EAJ errudun” lemapean. Protesta zergatik? Bada, EAJk sustatzen duen, eta Bizkaiko langileoi eragiten digun lan harremanen ereduagatik.
EAJk sustatzen duen lan harremanen eredu honek ozen salatu nahi ditugun bi oinarri ditu:
Atsegin handiz onartu eta ezarri du espainiar lan erreforma. Azken batean, jakin baitakite lan erreforma horrek patronalari mesede egiten diola, langileon lan eta bizi baldintzen prekarizazioaren kontura.
Atsegin handiz onartu ditu austerizidio politikak. Eta hauen ondorioz eratortzen diren zerbitzu publikoen pribatizazio, murrizketa politikak eta bertako langileon lan-baldintzen prekarizazio politikak.
Bereziki larria deritzogu Bizkaiko Foru Aldundiaren jarrera bere ardurapean dauden hainbat zerbitzu publikoren kasuan. Hala nola, Guggenheim eta adinekoen egoitzak. Egoitzen kasuan, zerbitzuak pribatizatu eta diru publikoa baliatuz, negozio pribatua egitea besterik bilatzen ez duten enpesen esku utzi zituen, nahiz eta lan baldintzak okertu eta ematen den zerbitzuaren kalitatearen kaltetu (adib: guztiz eznahikoak diren erratioak, …).
Aldundiak ezinikusiarena egiten du sortzen diren lan gatazketan. Guggenheimen kasuan, esate baterako, kaleratzeen aurrean Aldundiak ez du ezer egin. Beste lan gatazka batzuetan, esate baterako adinekoen egoitzenean, langileei leporatzen die zerbitzuan ematen den kalitatearen falta. Honen arrazoiak Aldundiak berak egiten duen inbertsio gabezian eta enpresa esleipendunen etekin gosean dagoenean.
EAJ, Bizkaiko Foru Aldundia eta azken hau zuzentzen duen Rementeria jauna dira zerbitzu publikoen arduradun nagusiak, eta hobe lukete zerbitzuok ahalik baldintzarik onenetan eskaintzeko, murrizketa eta inbertsio faltaren gainetik, egunero lanean ari diren langileen alde jarri, eta ez patronalaren alde.