Gure kezka adierazi nahi dugu azken hilabeteetan irakasleen kontrako eraso ezberdinen berri jaso dugulako. Gainera, kezka areagotu egiten da gertakarien jakinarazpena irakasleek beraiek eman digutenean. Izan ere, sindikatuak EAEko Hezkuntza Sailetik inolako informaziorik ez jasotzeak eta langileengandik beraiengandik jasotzeak berretsi egiten du kasu gehiago egon badaudela.
Azken erasoak icebergaren tontorra izan daitezkeela pentsatzen dugu. Horregatik, eta icebergaren tamaina jakiteko, Hezkuntza Sailari azken urteotan irakasleek jasandako erasoen datuak sindikatuei heleraztea eskatzen diogu. Langileen ordezkariekin, datuak mahai gainean, azterketa sakona egin eta arazoari aurre egiteko neurri eraginkorrak bilatu behar dira.
Gaur egun erasoen aurrean jarraitzen den protokoloaren eraginkortasuna zalantzan jartzen dugu. Berau berrikusteaz gain, erasoak ez gertatzeko prebentzio neurriak aztertu behar dira.