2026-11-19
HomeZerbitzu PublikoakOsasungintzaOsakidetzako EPEa, errespetu falta bat prozesuan parte hartu duten pertsonekiko

Osakidetzako EPEa, errespetu falta bat prozesuan parte hartu duten pertsonekiko

LAB sindikatuak 2014-15 EPE prozesuan parte hartzen ari diren milaka izangairekin Osasun Sailaren zein Osakidetzako Zuzendaritzaren errespetu falta salatu nahi du. Jarrera honen aurrean, LABek 2011an mahai gainean ipini zuen EPE sistema berri baterako eztabaida-proposamena eusten dio berriro ere. Gure alternatibak, hutsik gelditzen diren plaza guztiak eta sortu beharreko berriak jasotzen dituen bi urteroko EPEak proposatzen ditu.

Lehenengoz, EPE erabat eskasa inposatu dute, enplegu finkoa deuseztatzen duena, erretiroen hutsuneak ere ez baitira betetzen. Ez dira kategoria guztiak atera eta milaka pertsona sufriarazten dituzte plazarik ez lortzeko eta soilik lan-poltsetan sartu edo mantendu ahal izateko.

Bigarrenik, oposizio faseko azterketarako gaitegi amaigabeak ezarri dituzte, inoiz betetzen ez dituzten euren plan estrategikoak (kontratazioa murrizteko ez bada) eta propaganda irentsarazteko soilik pentsatuak.

Hirugarrenik, EPE eredu amaigabe, konplexu eta etsigarria planteatzen jarraitzen dute. Oztopoz beteriko prozesuak jende asko uzten du bazterrean, epe luzeen edota forma akatsen ondorioz.

Laugarrenik, azterketa masiboenetarako aste gutxi falta zenean, Osakidetzak 2016rako EPE berri bat izango dela egin du publiko, informazio gehiagorik eman gabe. Propagandaz gain, honako iragarpenak EPEa prestatzen hilabete luzeak eman dituzten izangaien kezkak areagotu baino ez zituen egin, gutxi barru berriro ikasi beharraren beldur beste ze kategoriatakoak izango diren ere ez dakigun plaza gutxi batzuen EPEa egin ahal izateko.
Hau guztia gutxi balitz, berriro ere inpugnatzeko galderak topatu ditugu azterketan eta erantzun-orriak irakurtzeko makinen akatsengatik, oker agertu dira ez dakigu zenbat jenderen emaitzak. Hau guztia ez al da adar jotze hutsa? Hurrengo egunotan inpugnazioak helaraziko dizkiogu Osakidetzako zuzendaritzari.

Osasun Saila eta Osakidetzaren jarrera honen aurrean, LABek 2011an mahai gainean ipini zuen EPE sistema berri baterako eztabaida-proposamena eusten dio berriro ere. Gure alternatibak, hutsik gelditzen diren plaza guztiak eta sortu beharreko berriak jasotzen dituen bi urteroko EPEak proposatzen ditu, baina berrikuntza nabarmenarekin: behin gaindituta, nota gordetzen da, beti ere nota igotzeko hurrengo deialdietan izena emateko aukera dagolearik. Neurri bakar honek goitik behera aldatuko luke milaka eta milaka Osakidetzako ebentualen bizitza, EAEn prekario gehien sortzen dituen enpresa publikoa, alegia.
 

 

 

AZKEN ALBISTEAK | ÚLTIMAS NOTICIAS

Arabako ardogintzaren sektorea mobilizatu egin da hitzarmenaren alde

Gaur izan da udazkeneko lehen mobilizazioa.

Anbulantzietan 1400 milioi euroko pribatizazioa geldiaraztea #LortuDugu eta zerbitzuaren publifikazio osoa exijitzen diogu EAEko Osasun Sailari

Kontratuen Inguruko Errekurtsoen Administrazio Organoak (KEAO) arrazoia eman dio sindikatuari, eta bertan behera utzi ditu bai larrialdietako anbulantzien (LGSS), bai anbulantzia ez-asistentzialen lizitazioak. Ebazpenek berretsi dute Osasun Sailak ez duela justifikatu baliabide propiorik ez izatea, eta gogorarazi dute legeak kudeaketa publiko zuzena lehenesten duela.

Nafarroako Enplegu Zentro Berezietako lan-prekaritatea salatu dugu eta diru publikoaren gaineko kontrol handiagoa eskatu dugu

LAB sindikatua mobilizatu egin da gaur goizean Nafarroako Enplegu Zentro Berezien (EZB) sektoreakin, Nafarroako Foru Komunitatean arlo horretako langileek pairatzen dituzten lan-baldintza prekarioak publikoki salatzeko. Sindikatuak Nafarroarako berariazko arau-esparru bat eskatu du, sektoreko langile guztientzako lan-baldintza duinak bermatzeko eta plantillen arteko desberdintasunak saihesteko.